Bico de leite

Reunión temática de febreiro

2012-02-17T11:19:00.002+01:00

O venres 24 de febreiro dedicaremos a nosa xuntanza a falar de lactancia e reincorporación ao traballo remunerado.
Veremos cómo poden compatibilizarse e, no caso de horarios laborais longos, cómo extraer e conservar o leite materno. Para isto pode servos útil o Manual de extracción editado por Fedegalma, do que podedes recoller unha copia impresa nunha das nosas reunións.
Nesta cuestión é especialmente importante que as nais e as demais persoas que coiden do bebé reciban a información e mais o apoio axeitados, e esa é a nosa tarefa;)
Así que, se vos interesa o tema ou tendes outras dúbidas sobre lactancia, vémonos o venres 24, de 17 a 19h, no noso local do Centro Lug II.

Gozade do Entroido e até pronto!

Dereitos das nais traballadoras
Artigo do grupo de apoio á lactancia Alba
Libro de LLL con experiencias de nais que aleitan e traballan fóra da casa

Fotos da nosa asemblea

2012-02-14T10:20:00.000+01:00

Hoxe hai un mes tivemos a asemblea ordinaria 2012.

Aquí podedes vernos falando do futuro de Bico...

... E aquí, no primeiro plano, o leite, sempre presente nas nosas vidas;)

Actividades realizadas no 2011

2012-02-08T09:22:00.000+01:00

Xaneiro
- día 23: asemblea ordinaria
- día 28: xuntanza temática sobre o peso do bebé

Febreiro
- día 25: xuntanza temática sobre a reincorporación ao traballo remunerado

Marzo
- día 11: festa de Entroido
- día 25
  .Lugo: xuntanza temática Lactancia e fertilidade
  .Foz: relatorio Normalizando o aleitamento materno

Abril
- día 29: xuntanza temática sobre o destete

Maio
- día 7: festa do certame de debuxo
- día 18: presentación do noso libro en Lugo
- día 27: xuntanza temática para futuros pais e nais
- día 28: relatorio-obradoiro Autoestima da nai

Xuño
- día 11: obradoiro de portabebés en Burela
- día 24: festa de fin de curso

Agosto
- do 5 ao 31: exposición fotográfica en Foz
- día 19: obra de teatro "Queres que cho conte?"

Setembro
- do 5 ao 29: exposición fotográfica en Burela
- día 11: asemblea extraordinaria
- día 30: reunión temática sobre a falta de leite

Outubro
- do 1 ao 8: Semana mundial da lactación materna
  .Foz:
   Presentación do noso libro
   Cine para mamás e bebés
  .Lugo:
   Exposición fotográfica no HULA
   Stand no San Froilán asociativo
- día 15: obradoiro Sentimentos de nais e pais
- día 28: reunión temática sobre o sono

Novembro
- do 8 ao 30: exposición fotográfica no Centro social Uxío Novoneyra
- día 5: obradoiro de masaxe infantil
- día 25: reunión temática sobre a alimentación complementaria

Decembro
- días 3 e 16: obradoiro de portabebés

Gañadora do sorteo

2012-02-03T13:13:00.002+01:00

Velaquí Ania recollendo o seu lote de libros...

“Comer, Amar, Mamar" de Carlos González
“Lo que hacen las madres, sobre todo cuando parece que no hacen nada" de Naomi Stadlen
“Dormir sin lágrimas” de Rosa Jové
“Maxia!” de Charo Pita e Madalena Matoso
“Ella” de Àngel Sauret

... moi ben acompañada das nosas asesoras Esther e Arantxa;)

Moitos parabéns!!!

Participade!

2012-02-01T08:13:00.000+01:00

Se tendes textos ou fotos de aleitamento que queirades publicar neste blog, pregámosvos nolas mandedes a bicodeleite@yahoo.es
Podedes contarnos:
Experiencias
Anécdotas
Novas
Fagamos deste blog unha valiosa ferramenta de comunicación sobre a lactación materna, construíndoo entre todos e todas -parécevos?

Cartaces de lactancia

2012-01-28T09:46:00.000+01:00

Dunha banda, velaquí o cartaz anunciador do Congreso Fedalma deste ano, realizado por María del Pilar Jiménez Salvador.
O congreso celebrarase os días 29 e 30 de xuño en Águilas (Murcia) e terá como lema "Lactación materna: un compromiso social", coa finalidade de resaltar a importancia de que as familias poidan exercer o seu dereito a aleitar e a vivir positivamente esta experiencia.
Nas webs de Fedalma e do grupo de apoio Lactancia feliz iredes atopando máis información sobre este congreso, mais xa podemos avanzarvos un dato: nel participará como relatora a nosa Patricia;)

Doutra banda, sabemos tamén que Alba lactancia, de Barcelona, organizará o Congreso Fedalma no 2013 e xa convocou o concurso de cartaces para anuncialo...

... Se vos animades a participar, podedes consultar as bases aquí.

Reunión temática de xaneiro

2012-01-22T09:32:00.000+01:00

Dedicaremos esta primeira xuntanza temática do 2012 a un tema sobre o que adoitamos recibir consultas: o peso do bebé.
Ao crermos que o bebé non mama dabondo, cómpre que analicemos catro indicadores:
- Ouriños
- Deposicións
- Estado xeral
- Peso
En canto a este último, teremos en conta as curvas de crecemento publicadas pola OMS no 2006 para nenos e nenas de peito, que podedes consultar aquí.
Na reunión veremos posíbeis situacións de baixo peso e resolveremos as vosas dúbidas sobre este e outros aspectos do aleitamento... e pasaremos un bo rato;)
Se vos interesa, xa sabedes: vémonos o venres 27 de xaneiro de 17 a 19h horas no Centro Lug II!

Programación do primeiro semestre

2012-01-21T10:07:00.001+01:00

Coma sempre, dedicaremos a xuntanza do derradeiro venres do mes a un tema, do seguinte xeito:

27 de xaneiro: o peso do bebé
24 de febreiro: lactancia e reincorporación ao traballo remunerado
30 de marzo: lactancia e fertilidade, embarazo e aleitamento en tándem
27 de abril: o destete
25 de maio: reunión especial para futuras nais e futuros pais
29 de xuño: festa fin de curso

Ademais estamos a preparar para a primavera:
-xornadas de asesoría en lactación materna
-concurso de debuxo na Mariña

Lembrade que se queredes botarnos unha man na asociación, so tendes que escribirnos a bicodeleite@yahoo.es... Toda axuda é benvida!

Boa sorte

2012-01-18T08:01:00.001+01:00

En decembro a nosa Patricia mudouse a Burriana (Castellón) coa súa familia, deixando en Bico de leite un oco irreemplazable. Como coidamos que non lle demos a homenaxe que merecía, tras todos estes anos de activismo e de axuda desinteresada ás nais lactantes, velaquí unha pequena entrada para que saiba que a botamos moitísimo de menos. Así se despedíu dela unha de nós hai uns días:

Ola Patri, entereime da túa partida o martes porque fun ao cole e preguntei por Román. Xa sei que sempre ando na verza, pero cando lía na lista algo do estilo "cando veña", pensei que estabas de vacacións, non que nos deixases. Primeiro, moita sorte alá onde esteas, malia que sei que non a precisas, ti mesma es garantía de éxito. Non pode ser doutra forma que adique un anaco da miña noite a darche as grazas por todo aquelo que aquí deixas feito. Coñecéndote, imaxino que tentarás seguir o máis vinculada posible a Bico, pero como nai, sinto enormemente non terte preto. Es un exemplo enorme para min como nai, pero sobre todo como muller, levas a chispa en todo o que fas e Bico perde un brazo sen ti. Como biqueira recente, tentarei aportar aquilo que teño, que non é máis que a ilusión por un proxecto compartido e pola necesidade innegable de defender aquilo no que creo, só son unha nai que quere dar a teta con liberdade e ser prexuízos.
Non sei o que poderei aportar, pero aquí me tedes. Grazas por todo o que fas e mil bicos, pisa forte, algunhas intentamos seguirte. Un bico de leite emocionado para ti e un enorme para Román, foi un pracer enorme compartir tan bos anacos de descubrimento xuntos. Na miña retina quedan moitas risas, algún que outro momento de frustación e moita ledicia por telo coñecido. É un gran neno. SORTE. (Rocío)

E para pechar esta entrada, en representación de todas as nais ás que axudou Patricia, velaquí unha fermosa imaxe da segunda lactancia da Rocío:

SMLM 2012

2012-01-11T12:49:00.002+01:00

WABA xa anunciou o lema da Semana Mundial da Lactación Materna 2012:

Comprensión do pasado-Planificación do futuro

Este ano celébrase:
-o vixésimo aniversario da Declaración de Innocenti
-o décimo aniversario da Estratexia mundial para a aimentación do lactante e do neno pequeno

Son obxectivos da vindeira SMLM:
1. Lembrar o acontecido nos derradeiros 20 anos de apoio á lactación materna
2. Celebrar os éxitos e mais os logros do movemento de apoio ás nais lactantes
3. Avaliar o estado de aplicación da devandita Estratexia
4. Chamar á acción para pechar as fendas das políticas e programas sobre lactación materna e alimentación do lactante e do neno pequeno
5. Chamar a atención pública sobre o estado das políticas e programas sobre lactación materna e alimentación do lactante e do neno pequeno
6. Amosar o traballo nacional a nivel mundial

Convocatoria de asemblea

2011-12-29T09:23:00.000+01:00

Convidamos ás socias e aos socios á asemblea que terá lugar no centro Lug2 o sábado 14 de xaneiro ás 10:30 horas.

A orde do día será a seguinte:
- Programación das nosas vindeiras actividades, sinaladamente:
. Concurso de debuxo sobre lactación materna
. Xornadas de asesoría en lactancia
- Renovación dos cargos de presidenta e secretaria
- Rogos e preguntas

Gostariamos ben de contar coa vosa asistencia...

E desexámosvos un moi feliz 2012!

Bo Nadal

2011-12-24T09:00:00.000+01:00

Gozade ben destas festas!
Moitos bicos... de leite

(Imaxe: fragmento do debuxo de Daniela Gómez Vázquez,
do CEIP Baamonde)

Avisos

2011-12-22T09:00:00.000+01:00

1- Malia que os e as peques teñan vacacións de Nadal, en Lugo en Bico de leite seguimos a reunirnos nestas datas...
-mañá 23 de 11 a 13h
-o venres 30 de 17 a 19h, mais non haberá reunión temática
... agás o venres 6, día de Reis, no que estaremos a abrir agasallos;)
2- Lembrade que gañará a nosa rifa de Nadal aquela persoa que elixiu o número que coincida coas dúas derradeiras cifras do primeiro premio da lotería. Como algúns números están en branco, en defecto de gañadora, consultaremos o segundo premio, e, no seu caso o terceiro... Que temos moitas ganas de dar ese lote de libros!
3- E o máis importante... Esperamos que hoxe toque o 47126;)

A duración do aleitamento

2011-12-17T13:54:00.000+01:00

1- "O patrón de duración da lactancia nos humanos até hai menos de cen anos, e aínda hoxe en sociedades non contaminadas pola civilización predominante, foi de 3 a 4 anos con variacións entre o ano e os 7 ou máis anos. Arestora a Organización Mundial da Saúde (OMS) e mais o Fondo das Nacións Unidas para a Infancia (UNICEF) recomendan manter o aleitamento até os 2 anos ou máis en todos os países do mundo."
(Fonte: web da Academia española de pediatría)

2- Galicia (datos INE 2006) tén as taxas de lactancia máis baixas de España:
48,2% bebés maman ás 6 semanas
38,3% bebés maman aos 3 meses
17,5% bebés maman aos 6 meses

3- Conclusión: debemos preocuparnos pola CURTA duración da lactancia, non pola súa EXCESIVA duración...

Para máis información:

Blog Ileana Medina
Blog Eloísa López
Artigo Katherine Dettwyler
Artigo Jack Newman

Este venres...

2011-12-13T21:07:00.004+01:00

... en FOZ:

A partir das 18h na nosa xuntanza na casa da Xuventude faremos unha merenda para despedir ben o 2011;)

... en LUGO:

Teremos dúas actividades:
- xuntanza de 11 a 13h
- obradoiro de porteo de 16 a 18.30h

Sexa na Mariña ou na capital... Agardámosvos!

Lactancia e gardarías

2011-12-10T14:04:00.000+01:00

Para esta entrada tivemos a sorte de entrevistar a Beatriz Ferreira Varela, socia de Criando e directora da escola infantil municipal A Caracola (A Coruña). Á vista de que moitas gardarías poñen trabas á lactación materna, queremos deixar constancia de que outro xeito de traballar, 100% respectuoso co aleitamento, é posíbel...

Preséntaste?

Pois teño dous peques, unha nena de 6 anos (con dous e medio de teta) e un segundo de 20 meses (adoptado e cunha relactación frustrada), e se me unín a Criando foi agradecida por o que vin e sentín, xa que aínda que acudín sen problemas coa miña lactancia, quería aprender máis e logo quedei...

A OMS recomenda aleitar dous anos como mínimo e a duración media do aleitamento en España está en tres meses... Por que?

A iso quero contestar cunha reflexión... Canto maior me fago, máis comprobo que as mamás non teñen INSTINTO propio e se deixan aconsellar polos demais, e é aí onde conseguen un criterio de actuación. Así, se as túas amigas non dan teta… ti non darás teta, se na túa familia ninguén aleitou, ti non te lanzas... Falo da maioría dos casos. Para min o título do libro de Carlos González “Un agasallo para toda a vida” deixa claro que a lactancia é só para unhas elixidas e eu síntome orgullosísima do vivido coa miña filla Dulce, algo inimaxinable e irrepetible. Nestes momentos nos que estamos en plena aterrizaxe dun novo curso chegan as mamás con bebés de 4, 6, 8 meses e coa súa teta por bandeira e eu axúdolles e infórmolles de que se queren seguir coa teta que non a deixen, que esta escola fará o indecíbel para que sigan lactando, que malia que haxa uns horarios estipulados que debemos cumprir (entradas e saídas), as nais lactantes poden vir cando queiran, e aquelas que polo seu horario non poden vir son alentadas, apoiadas, confortadas... para que non abandonen. E se o fan ou as vemos desanimadas, axudámoslles co destete.

Con que obstáculos dan as nais que aleitan máis tempo "do habitual"?

Unha nai que dá a teta máis de 6 meses sempre leva unha etiqueta: es rariña, desas que paren na casa, non traballas... Non está ben visto e, para colmo, as mamás déixanse aconsellar e, se dan con algún obstáculo, o umbral de sufrimento é diferente dunhas a otras…. En todo caso, non se pode forzar algo así.

Existe en Galiza una normativa sobre promoción do aleitamento materno nas escolas infantís? (seica hai uns anos presentouse unha proposición non de lei no Parlamento autonómico que quedou en nada...)

Si, no 2006 presentouse no Parlamento galego esa proposición e eu non sei se se aprobou, mais eu collina por bandeira e sae en todas as circulares que edito, nos folletos de presentación que entrego ás familias... en todo. As escolas son cada vez máis conscientes de que hai que coidar a imaxe que se dá nelas. En varias municipais da Coruña demos relatorios ás familias e ao persoal educativo.
É a nosa obriga axudar ás mamás e eu sempre digo que, se te tratan mal, reacciones, escribas, cando alguén interrompe ou impide o teu dereito natural de alimentar ao teu fillo ou á túa filla.

Por que nalgunhas garderías non se permite que a nai leve leite materno extraído para que, mentres ela traballa, se alimente ao seu bebé? Consecuencias disto.

Iso faise POR DESCOÑECEMENTO, FALTA DE FORMACIÓN DA DIRECCIÓN E DO PERSOAL... O que descoñeces ou non te interesa, apártalo, prohíbelo...
E as consecuencias?
Pois en moi poucos casos a resposta é enfrontarse. Na maioría asumes e non rechistas porque a tónica xeral é ver as escolas como INIMIGAS DA LACTANCIA MATERNA. Xa fartei de expoñelo en relatorios de Carlos González ou de Rosa Jové, nas que nos critican, ás veces nelas expuxemos a nosa visión da escola…
Frecuentemente as familias queren deixar a teta e ven a escola coma unha salvación e as que reciben axuda e mimos (si, mimos) para que sigan, atopan o apoio para prolongar a súa lactancia o tempo que desexen. O que teño claro é que na miña escola ninguén vai deixar a teta porque nós llo prohibamos.

Por que a sociedade espera un destete forzoso antes de que a/o nena/o comece o colexio? Consecuencias disto.

Coido que xa dei razóns dabondo...
Aleitar dá moitas satisfaccións, pero se ti, despois de parir, non atopas máis que inconvenientes, asígnanche un pediatra que de doenzas saberá moito, mais de alimentación, e xa non digamos de teta, non sabe ou non lembra o aprendido na carreira... Quen vai dar a teta? Este é un tema terrible. Non preguntas polos pediatras, pero son os inimigos nº1 das nais lactantes. A maioría (si, maioría) das nosas consultas son de nais desesperadas porque o seu pediatra lles di que o bebé non engorda, e, no canto de analizar como mama, suplementan con leite artificial... E veñen a nós pedindo auxilio e chorando, para oír que tamén poderían terlles aconsellado un suplemento de máis teta, máis veces e sen reloxo.

Agradecemos moito a Beatriz que compartise connosco as súas reflexións sobre a súa apaixoante labor e aproveitamos para deixarvos aquí dous documentos que, algún día, esperamos ver en galego:

Tríptico sobre a normativa do aleitamento nas escolas infantís

Rede de apoio á lactación materna (centros de saúde, escolas infantís e grupo de apoio)

Novo obradoiro de porteo

2011-12-06T21:23:00.001+01:00

É unha fachenda para Bico de leite que o obradoiro de porteo do pasado sábado fose un éxito, así que queremos dar as grazas a Bea polo seu esforzo e ao público pola súa asistencia e participación.

Debido a que se nos fixo un pouco curto, imos repetilo o venres 16 de decembro de 16 a 18.30 no Centro Lug2, organizándonos do seguinte xeito:
- de 16 a 17h impartirase de novo a parte teórica
- de 17.15 a 18.30 faremos prácticas cos distintos portabebés

Contactaremos vía mail coas persoas que asististes o sábado, coa finalidade de que asistades á parte práctica, de balde e sen necesidade de inscrición.

As demais persoas precisades inscribirvos en bicodeleite@yahoo.es, lembrade que o obradoiro é gratuíto para socias e socios e só custa 5€ para as demais persoas.

Animádevos a vir... Seguro que logo lles pedides aos Reis un mei ou un pouch...
;)

Que lle merco?

2011-12-03T10:59:00.000+01:00

Achégase o Nadal e algunhas socias pensamos proporvos ideas de agasallo concordes coa filosofía biqueira...

Ademais dos dous libros que seguimos a vender nas nosas reunións ("Cinco anos de Bicos... de leite" a 10€ e "Pel con pel" a 12€), atoparedes máis lecturas recomendadas aquí:

Lista 1
Lista 2

En canto a outros obxectos, velaquí o que se nos ocorreu...

Fular elástico para portear a recén nacidos
Mei tai para portear nenos/as a partir dos 5 meses
Xoguetes de madeira ou de cartón reciclado
Bonecas embarazadas, que paren, portean, aleitan
Bebé glotón
Portabonecos
Ovos sorpresa de chocolate de comercio xusto

... Ou tendes vós algunha suxerencia?;)

Pequeno cambio de horario

2011-11-29T19:02:00.001+01:00

O obradoiro de porteo será este sábado de 11.15 a 12.45, perdoade as molestias...
Bicos de leite

Obradoiro de portabebés

2011-11-26T11:25:00.005+01:00

O sábado 3 de decembro de 11.30 a 13.30 no Centro Lug2 teremos un obradoiro de porteo, impartido novamente por Bea de Serdoulas, unha auténtica experta no tema.
Velaquí o programa:
-Falaremos dos beneficios de levar así a nosos fillos e a nosas fillas
-Probaremos os distintos tipos de portabebés
-Resolveremos as vosas dúbidas
Lembrade que esta actividade é de balde para persoas asociadas e custa só 5€ para as demais.
Se vos interesa, inscribídevos xa en bicodeleite@yahoo.es...

Agardámosvos!!!

Apoio a Preescolar na casa

2011-11-21T16:00:00.000+01:00

Nós, a asociación Bico de leite, queremos manifestar o noso apoio á Fundación Preescolar na casa e animámosvos a participar nos vindeiros actos en prol da súa continuidade:

- Recollida de firmas (podedes asinala aquí)
- Manifestación este sábado 26 de novembro en Lugo, que sairá ás 12h da praza do Ferrol, primeira sede do devandito proxecto, e irá até a praza da estatua de Antonio Gandoy, o seu fundador.

Grazas pola vosa colaboración!

Seguiremos informando...

Reunión temática de novembro

2011-11-19T09:32:00.000+01:00

O venres 25 de novembro de 17 a 19h no Centro Lug2 (r/ Pintor Corredoira 4) teremos a nosa xuntanza temática mensual, que esta vez tratará sobre ALIMENTACIÓN COMPLEMENTARIA.
Aos bebés alimentados con lactación materna exclusiva comezarán ofrecérselles outros alimentos cando cumpran 6 meses, se ben o aleitamento debería durar, segundo a OMS, até os 2 anos como mínimo.
Para iniciar este ofrecemento doutros alimentos cómpre:
-que o bebé se teña sentado,
-que perdera o reflexo de extrusión (é dicir, que manteña o alimento na boca),
-que amose curiosidade por outros alimentos,
-que saiba dicir non (con palabras ou xestos) -para que cando exprese este rexeitamento, respectemos a súa decisión e non o forcemos a comer.

Para máis información:

Relatorio de Carlos González
Recomendacións da Unión europea
Información sobre alimentación complementaria a demanda

Na reunión intercambiaremos experiencias neste tema e tamén resolveremos as dúbidas sobre lactancia que nos plantexedes.

Vide compartir a tarde do venres connosco!

Hoxe é o Día internacional do bebé prematuro...

2011-11-17T10:24:00.000+01:00

... e este ano reivindícase especialmente o seu dereito a ser acompañado pola súa familia de forma continuada durante a súa estancia no hospital...

Guía de UNICEF sobre este dereito
Campaña Que no os separen
Guía do método nai canguro

A inhibición farmacolóxica da lactancia

2011-11-15T10:05:00.001+01:00

Existe unha situación na que tomar as pílulas para cortar o leite é unha boa opción e estas están indicadas: cando a muller vén de ter o seu bebé hai poucas horas e NON quere iniciar o aleitamento materno. Neste caso a cabergolina, que é o fármaco mais utilizado hoxe en día con este fin, causa unha redución brusca do nivel de prolactina en sangue e (na meirande parte dos casos, aínda que non sempre) evita a subida do leite.
Así e todo, cómpre sinalar que:
- Este medicamento non está exento de riscos, e a miúdo causa efectos secundarios como mareos, vómitos, cefaleas e hipotensión. Se cadra, estos efectos adoitan atribuírse ao posparto inmediato e confúndense coa "normalidade" sen ser tal.
- Toda muller debería ser ben informada, a priori e con tempo, dos posibles riscos de tomar esa medicación, así como do perigo para a saúde que significa suprimir a lactancia, a curto e a longo prazo, para ela e o seu bebé.
Lamentablemente, son moitas outras as circunstancias en que este fármaco é prescrito para ás nais, co suposto fin de suprimir a lactancia pero con dudoso éxito.
Hai que ter en conta que, unha vez trascorridas as primeiras semanas tralo parto, os niveis de prolactina van volvendo naturalmente á normalidade e a produción de leite é regulada pola sución do bebé e polo propio baleiramento do peito, de xeito que baixar os niveis de prolactina hipofisaria ten pouco ou ningún efecto sobre a función da glándula mamaria, e sobre a lactancia en sí mesma.
Todo isto vén significar que as devanditas pastillas non van causar o efecto desexado de "cortar o leite" (aínda que si poden ter os outros efectos secundarios, e case sempre baixan a producción nalgunha medida).
Con demasiada frecuencia, as nais atópanse con ingurxitacións e dor por simple acumulación de leite despois de tomaren as pastillas que supostamente lles ían "quitar o leite" e non fixeron tal.
Situacións típicas deste tipo son:
-Mastites: nestes casos confiar nas pastillas é especialmente perigoso, xa que é preciso manter o aleitamento para seguir extraendo o leite do peito e curar así o proceso, evitando a formación de abscesos. Isto engadido a que a medicación vén seguida da indicación estricta de "non aleitar".
- Destetes repentinos: sinxelamente para deixar de amamantar "aquí e agora" por mil e un motivos, xustificados ou non, adóitase receitar cabergolina, coa idea de que ao tomala o leite desaparecerá inmediatamente sen maior complicación... Véndose entón as nais na anterior tesitura de peitos ingurxitados e risco de mastitis, xunto con posibles efectos secundarios, ademais de sentirse loxicamente confusas e desorientadas co que aconteceu... que foi contrario ás súas expectativas...
Co tempo, o leite acaba por marchar, pero do mesmo xeito que marcharía por falta de succión e de estímulo en varios días ou semanas e sen tomar o fármaco.
Lembremos que destetar é un proceso que se debería facer sempre de xeito progresivo, que non precisa de medicación algunha e, sobre todo, que é unha decisión que a nai debe tomar libremente despois de ser correctamente informada de todas as opcións posibles e das implicacións que pode ter a súa decisión para ela e o seu bebé.

Patricia
IBCLC

Traballando arreo

2011-11-11T15:44:00.004+01:00

Belén o pasado sábado impartindo o obradoiro de masaxe infantil...

Na prensa local

Patricia o luns inaugurando a exposición fotográfica no Centro social Uxío Novoneyra...
(fonte: La Voz de Galicia; autor: Pradero)

Na prensa local

Esther hoxe falando do aleitamento materno ao alumnado do Ciclo de educación infantil do Politécnico...

De compras

2011-11-10T09:07:00.000+01:00

Lembrámosvos as cousas que podedes mercar nas nosas reunións...

-Libro "Cinco anos de Bicos... de leite" (consultas de lactancia): 10€
-Libro "Pel con pel" (fotografías e poemas): 12€
-Boletos para o noso sorteo de Nadal: 3€
-Lotería de Nadal: 5€ -mirade que número máis bonito!;)

... E os fins aos que se destina a recadación (artigo 2 dos nosos estatutos):

1) Reunir a futuras nais, mulleres embarazadas, nais lactantes ou que o foran, e a persoas interesadas na lactancia materna.

2) Proporcionar información e apoio ás mulleres que desexen disfrutar dunha lactancia materna exitosa, a través da organización de grupos de apoio, constituídos fundamentalmente por nais en distintos puntos da provincia de Lugo.

3) Protexer, promover e apoiar a lactancia materna divulgando a súa importancia en todos os ámbitos da sociedade,(familias, profesionais sanitarios, educadores, outros estamentos interesados e medios de comunicación), mediante distintas iniciativas de sensibilización e normalización, cooperando, así mesmo, con outras organizacións de fins semellantes.

4) Defender o dereito de todas as mulleres a amamantar os seus fillos/as tanto tempo como desexen e a recibir todo o apoio social e profesional para acadalo.

5) Informar ás mulleres sobre os seus dereitos laborais en período de lactancia, velar polo seu cumprimento e loitar pola homologación no ámbito europeo en cuestións como permiso por maternidade, axudas económicas, apoios institucionais, etc...Loitando así pola conciliación laboral e familiar e promovendo a igualdade de xénero conforme prevé o artigo 9.2 da Constitución Española.

6) Difundir información sobre a existencia de grupos de apoio á lactancia materna entre a poboación da provincia de Lugo (obxectivo recollido no tratado conxunto elaborado en 1989 pola OMS e UNICEF, Iniciativa Hospital Amigo dos Nenos)

7) Protexer os intereses e dereitos das nais no ámbito sanitario e social, defendendo os cambios normativos necesarios para facilitar o desenvolvemento da lactancia como son:

a) Dereito da muller a estar en compañía da súa parella ou doutra persoa de confianza durante todas as fases do parto.

b) Dereito a unha atención sanitaria máis respectuosa durante o parto, no que a muller poda poñer ao seu fillo/a ao peito nada máis nacer, favorecendo deste xeito o vínculo nai-fillo/a e o inicio exitoso da lactancia.

c) Dereito a ser informada, apoiada e respectada durante o periodo de embarazo e lactancia.

d) Dereito da nai de permanecer co seu fillo/a en caso de hospitalización de calquera dos dous, especialmente durante a lactancia.

e) Dereito a continuar coa lactancia materna unha vez reiniciada a actividade laboral, reivindicando o permiso de maternidade de 6 meses, as reducións de xornada laboral, excedencias pagadas e incremento de prazas de garderías públicas cercanas aos centros de traballo.

8) Promover a sensibilización da directiva e persoal dos servizos sanitarios para que os intereses das nais sexan defendidos na práctica diaria tal como se recolle no Plan Integral de Atención Sanitaria e Social da Muller do Sergas.

Grazas pola vosa colaboración!

Exposición no Uxío Novoneyra

2011-11-05T14:10:00.003+01:00

A nosa exposición fotográfica segue a viaxar...

Tralo seu paso polo Centro Cenima de Foz, a Casa da cultura de Burela e o hall do Hospital Lucus Augusti, agora podedes ver as fermosas fotos do concurso de Fedegalma do 2009, acompañadas de textos escritos polas socias de Bico de leite, no Centro social Uxío Novoneyra (r/ Quiroga Ballesteros, s/n).

Alí estará do 8 ao 30 de novembro, de luns a venres, de 16 a 21h.

Se aínda non a vistes... esta é a vosa oportunidade;)

E aproveitamos para convidarvos ao acto de inauguración, que terá lugar este luns 7 ás 19h, así como para agradecer ao Concello a súa colaboración.

Cartaz

Patricia, IBCLC

2011-11-03T18:18:00.005+01:00

No verán a nosa Patricia escribiu un fermoso texto, inspirado nesta foto da derradeira toma do seu terceiro fillo...

UN ANO DESPOIS DO DESTETE

Hoxe o meu fillo pequeno cumpre 6 anos e hoxe hai un ano que nos destetamos.
Un longo camiño percorrido que empezou aínda moito antes... se cadra xa cando que eu mesma fun aleitada pola miña nai, e mais aínda dende que lin os primeiros contos onde se falaba da teta e saían unhas fermosas ilustracións que así sen decatarme, posiblemente marcaron o meu camiño para sempre.
Podo dicir sen temor a trabucarme que a lactancia cambiou a miña vida.
Lembro con nitidez a primeira toma do meu fillo maior, esa naturalidade coa que se prendeu ó peito e mamou sen máis, sen dor, sen incomodidades, tan sinxela e directamente, chegoume ó corazón.
Logo, veu a súa irmá e con ela o meu mundo empezou a medrar de verdade; comecei a aprender mais sobre a lactancia e sobre crianza. Todo cobrou un novo sentido para min... unha nova vocación tomaba forma na miña mente e nas miñas entrañas...
Cando o meu terceiro pequeno entrou na escena, xa tiña eu bastante claro que quería tratar con outras nais para axudalas no posible a vivir as súas lactancias tan ben como eu vivía as miñas.
Aínda non sabía daquela canto mais me ían aprender a min esas outras nais, e canto sairía eu gañando nestas entrañables relacións entre iguais, tan variadas como o é a propia humanidade.
O universo puxo no meu camiño a Bico de Leite, o meu benquerido grupo de lactancia, e xa nada tivo volta atrás.
Paso horas e horas lendo sobre lactación, falando con nais, ás veces con pais ou profesionais, mirando incansable a pantalla do ordenador e absorbendo como unha esponxa toda a información posible sobre o aparentemente inacabable tema da teta...
Que terá tanto que falar este asunto?
Que será tan apaixonante no simple feito de que unha muller alimente a un neno? O normal.
Non sei, se cadra hai cousas na vida tan interesantes; mais eu vexo nesto un compendio de todas as ciencias e as artes do mundo.
A lactancia é un percorrido pola embrioloxía e a anatomía, a xestación e o nacemento, a neonatoloxía, a pediatría, a xinecoloxía, a endocrinoloxía, a psicoloxía, a socioloxía e a historia.
A lactancia é unha función fisiolóxica, é un feito médico, é tamén un acto social, é unha maneira de relacionarse e mais é unha forma de autocoñecemento.
Aleitar é nutrir o corpo mais é un acto de amor. A teta é a poesía e a ciencia a un tempo.
Pouco mais se lle pode pedir … Ou non?
Hai poucas semanas que me presentei a un exame de certificación internacional como consultora de lactancia... Que vos parece? isto da teta tamén é unha profesión!
Hoxe, que vai un ano da derradeira toma do meu último fillo, a lactancia para min segue sendo un camiño cheo de futuro...
Porque dar a teta é só o principio do principio, pouco hai mais marabilloso que (como os bebés) ter aínda toda a vida por diante.

(orixinalmente publicado no blog A falar da teta do grupo de apoio Alma)

... E hoxe temos a honra de anunciar que Patricia, presidenta e asesora de Bico de leite... XA É IBCLC (consultora certificada de lactación materna)! Aquí podedes ler máis sobre este título, que no noso país só ostentan unhas 50 persoas...

En nome de todas as biqueiras... Moitos parabéns Patri!!!

Segundo obradoiro de outono

2011-10-29T10:04:00.000+02:00

O sábado 5 de novembro ás 11.00 no Centro social Maruja Mallo (r/ Primavera 37, Lugo) a nosa socia e fisioterapeuta Belén García Iglesias impartirá un obradoiro de MASAXE INFANTIL.
Este obradoiro é gratuíto para as socias e custa só 5€ para as demais persoas.
Segundo a Asociación española de masaxe infantil, esta "é unha antiga tradición en moitas culturas do mundo, que se transmitiu de nais a fillas e que foi redescuberta en Occidente. Moitos estudos de investigación revelan a necesidade do contacto afectivo como parte fundamental dos primeiros anos de vida, e a masaxe infantil é un dos máis agradábeis e doados métodos para establecer este primeiro contacto... O bebé non se nutre só de comida, precisa fundamentalmente amor e agarimo, que lle proporcionen unha seguridade e acollida emocional para poder crecer de xeito armónico".

Convencímosvos, non si? Pois inscribídevos antes do sábado 5 en bicodeleite@yahoo.es, ese día vide co voso bebé, unha mantiña e aceite de masaxe, e listo!;)

Reunión temática de outubro

2011-10-21T09:00:00.000+02:00

O venres 28 de outubro de 17 a 19h no Centro Lug2 (r/ Pintor Corredoira 4) teremos a nosa xuntanza temática mensual sobre LACTANCIA E SONO.

Este tema adoita preocupar ás nais e aos pais, como é lóxico, xa que durmir é unha necesidade fisiolóxica básica;) así que velaquí máis información para mellorar as noites... Xa vos avanzamos que a evidencia científica apoia que a familia durma xunta, habida conta da fase de exteroxestación dos nosos bebés.

Web Dormir sin llorar
Web Alba lactancia materna
Tríptico Unicef sobre o coleito

Desta e doutras cuestións relativas ao aleitamento falaremos o vindeiro venres.

Lembrade ademais que ese mesmo día temos dúas actividades máis:
- Ás 12h no Salón de actos do HULA terá lugar o acto de clausura da exposición fotográfica sobre lactación materna, coa proxección do documental "Restaurar o paradigma orixinal", do doutor Nils Bergman.
- Ás 18.30 no Centro CENIMA de Foz proxectarase o documental "O peito non ten horario", da experta consultora en lactación materna Gro Nylander, acto ao que bebés, nenos e nenas son moi benvidos.

A entrada a estes tres eventos é libre e gratuíta.

Agardámosvos!

Exposición fotográfica no hospital de Lugo

2011-10-17T09:09:00.003+02:00

Coma un máis dos actos da Semana mundial da lactación materna, e tralo seu paso por Foz e Burela, ao longo do mes de outubro podedes gozar da exposición fotográfica no hall do Hospital Lucus Augusti, coas fermosas fotos do concurso de Fedegalma do 2009, acompañadas de textos escritos polas socias de Bico de leite.

Cartaz

Clausurarase o venres 28 de outubro ás 12.00 no Salón de actos do devandito hospital, evento no que se proxectará o documental de Nils Bergman "Restaurar o paradigma orixinal". O doutor Bergman dirixe a Maternidade do Hospital de Mowbray (Sudáfrica) e é un prestixioso investigador e defensor do método canguro (lactación materna e contacto pel con pel), que a Organización mundial da saúde recomenda implementar en todos as Unidades de Neonatoloxía.

Aproveitamos para agradecer ao Hospital Lucus Augusti a súa actitude favorábel dende o inicio para albergar esta exposición e para a celebración do acto ao que agora vos convidamos, no que se amosará o devandito documental, cuxo visionado, tanto para profesionais como para familias, consideramos imprescindíbel.

Animádevos a asistir!

Sorteos

2011-10-15T13:36:00.001+02:00

De cara ao Nadal, tendes dúas opcións máis para colaborar coa nosa asociación, mercando:
- ben participacións de lotería, por 5 € (recargo 1€) - o número evos ben bonito... e o cartaz aínda máis...;)
- ben boletos da nosa rifa (3€), na que poderedes conseguir este lote de libros:
“Comer, Amar, Mamar" de Carlos González
“Lo que hacen las madres, sobre todo cuando parece que no hacen nada" de Naomi Stadlen
“Dormir sin lágrimas” de Rosa Jové
“Maxia!” de Charo Pita e Madalena Matoso
“Ella” de Àngel Sauret

Moitas grazas por adiantado!

Primeiro obradoiro de outono

2011-10-10T08:54:00.003+02:00

O sábado 15 de outubro de 10.30 a 12h no Centro social Maruja Mallo (r/ Primavera 37, Lugo) Carmen Sirvent Artiaga impartirá un relatorio-obradoiro sobre SENTIMENTOS DE NAIS E PAIS.
É a segunda vez que contamos coa colaboración altruísta desta psicóloga, tralo obradoiro de primavera, que fora un grande éxito. Para quen non a coñezades, dirémosvos que Carmen é unha marabillosa terapeuta humanista de exquisita intuición e ampla experiencia, especializada en maternidade e psicoloxía infantil.
Nesta ocasión falaremos dos sentimentos que xorden en nós como consecuencia de ser nais e pais, analizarémolos, intercambiaremos experiencias...
O obradoiro é gratuíto para as socias e custa só 5€ para as demais persoas.

Gostabamos ben de que viñésedes;)

Nota: Pregamos puntualidade, xa que Carmen tén de saír ás 12 en punto (graciñas)

Cinema na Mariña

2011-10-08T10:34:00.004+02:00

Coma parte das celebracións da SMLM 2011 na Mariña, que comezaron o pasado sábado 1 coa presentación do noso libro, agora propoñémosvos un ciclo de cinema que esperamos que vos guste.

Proxectaremos dous filmes do ano 2010, ambos moi recomendábeis, ás 18.30 no Centro CENIMA de Foz:

- 14 de outubro: Bebés

Este documental francés segue a vida de catro bebés, durante o seu primeiro ano de vida, en diferentes lugares do mundo. Nel temos a oportunidade de ver como transcorre o día a día destes nenos e nenas e de comparar como se relacionan co seu contorno de diferente xeito, segundo onde vivan...

- 28 de outubro: O peito non ten horario

Este documental noruegués, entre outras cuestións, trata a relación do fracaso do aleitamento coa separación nai-bebé. Os textos son da experta asesora Gro Nylander.

A entrada é libre e gratuíta, sendo os bebés, os nenos e as nenas máis que benvidos. Trátase de pasar un bo rato en familia -agora que vén o frío;)

Vémonos alí!

Cartaz

Comezan as festas...

2011-10-04T18:03:00.001+02:00

... E comprácenos anunciarvos que este sábado 8 na praza de Santo Domingo (tralo kiosko de prensa), participaremos nesta interesante iniciativa, xunto con estas 11 asociacións:

A cova da terra
Adega
Asambleia anticapitalista lucense
Axunica
Ayuda en acción
Bandullo ecolóxico
Implicadas no desenvolvemento
Mádia leva
15-M
Asociación pola defensa do parque Rosalía
Proxecto home

Esperamos que este sexa só o inicio dun traballo en rede con outras asociacións que operan na nosa cidade.

Non esquezades pasar polo noso stand!

Nota: Gardaremos a recadación nunha caixa de caudais que foi un agasallo da ferretería Nodal -grazas;)

Así foi a presentación do noso libro na Mariña

2011-10-03T09:41:00.007+02:00

O sábado fixemos unha bonita presentación do noso libro:

Esther leu unha consulta, que empezou ela e.... rematou Sabela...
Beni falou un pouco do inicio da asociación e da formación do grupo da Mariña, así como da importancia dos grupos de nais...
Patricia leu manifesto da SMLM 2011...

E logo seguimos falando do que facemos e non facemos nos grupos de lactancia.

Gozamos moito deste acto, no que seguimos o lema da SMLM que con el inauguramos: COMUNICÁMONOS

Grazas mil...
Ás organizadoras (Montse, Carina, María José)
Ás que participastes na presentación
Ás que asististes a ela
E especialmente á dona da libraría Ofifoz, polo seu apoio e a súa colaboración desinteresada

Seguimos a tecer redes...

Prensa

Regresamos ao Centro Lug2...

2011-10-03T09:38:00.003+02:00

A partir de outubro volvemos reunirnos no Centro Lug2 (na intersección das rúas Armando Durán e Pintor Corredoira).
Debido á xestión privada deste centro dependente da Xunta de Galicia, agora cóbrase pola utilización das súas instalacións -tamén ás entidades sen ánimo de lucro, coma a nosa (aínda que a contía a pagar sexa menor: 30€ ao ano).
Tivemos un debate interno sobre se seguir reuníndonos alí, xa que na nosa asociación non estamos de acordo coa privatización dos servizos públicos, incompatíbel co modelo de Estado social que sería desexable.
Porén, por diversos motivos de carácter práctico, decidimos seguir celebrando alí as nosas xuntanzas (polo menos até decembro 2012) e...

... Agardámosvos!

SMLM 2011: programa

2011-10-01T09:15:00.009+02:00

Como sabedes, hoxe comezan en todo o mundo as celebracións pola Semana da lactancia materna, con ocasión da cal programamos os seguintes actos:

En Foz...
   Presentación do noso libro "Cinco anos de Bicos... de leite": hoxe 1 de outubro, ás 18:00 na libraría Ofifoz (cartaz aquí)
   Cine para mamás e bebés (programa por determinar)

En Lugo...
   Exposición fotográfica no Hospital universitario Lucus Augusti: todo o mes de outubro (cartaz aquí)
   Participación no San Froilán asociativo: día 8 de outubro na praza de San Marcos

SMLM 2011: manifesto

2011-10-01T09:00:00.002+02:00

Lactancia materna: Fala connosco!

MANIFESTO

Dende Bico de leite e dende todo o movemento social a favor da lactancia materna, recoñecemos:

• Que a lactancia materna é un dereito de todas as familias.

• Que aumentar a duración do aleitamento ten efectos positivos para toda a comunidade.

• Que o apoio ás familias que elixen aleitar a seus fillos e súas fillas pasa por unha boa información, unha boa atención sanitaria, o respecto social, medidas de conciliación familiar e laboral axeitadas e tamén pola implicación de todos os seus membros.

Temos en conta:

Que a comunicación é un elemento esencial para protexer a lactancia materna e apoiar ás mulleres que aleitan.
Que arestora enos posíbel comunicarnos a través de grandes ou pequenas distancias nun intre.
Que xurdiron novos canais que permiten actualizar coñecementos e difundir información fiable e actualizada sobre lactancia materna.

Cremos que cómpre:

Traballar en rede alén do noso tempo e lugar, propiciando deste xeito o debate e o diálogo a todos os niveis e en todos os eidos.

E, polo tanto, pedimos:

• Que dende todos os ámbitos se difunda información fiable e actualizada sobre lactancia materna.
• Que as entidades, persoas e organismos comprometidas co apoio ás nais lactantes dispoñan de recursos para dar visibilidade á situación actual da lactancia e atender ás nais.
• Que as familias poidan atopar con facilidade recursos na súa comunidade que lles ofrezan información e apoio no seu desexo de aleitar.
• Que se dea visibilidade e apoio ás necesidades das familias que aleitan.

Feliz Semana Mundial da lactancia materna!!!

Presentación do noso libro en Foz

2011-09-26T08:11:00.000+02:00

O vindeiro sábado 1 de outubro ás 18:00 na libraría Ofifoz (avenida da Mariña 46), as nosas asesoras mariñás presentarán o libro "Cinco anos de Bicos... de leite", no que recollemos unha selección das consultas que contestamos por mail nos primeiros cinco anos de traxectoria da nosa asociación, clasificadas por temas.
Lembrámosvos que podedes adquirilo nas nosas xuntanzas a un prezo de 10 euros e a recadación destinarase ás nosas actividades de promoción da lactación materna. Tamén o atoparedes na devandita libraría e nestas dúas:
- Burela: Comercial Auma (libraría da igrexa)
- Lugo: Libraría Trama (avenida da Coruña 21)

A presentación mariñá marca o comezo dos actos da Semana mundial da lactación materna...

... Gostariamos ben de que nos acompañásedes!

Reunión temática de setembro

2011-09-23T11:27:00.001+02:00

O venres 30 de setembro de 17 a 19h na Aula de educación maternal do SERGAS (r/ Doutor Garcia Portela 11-baixo, Lugo) teremos a nosa primeira reunión temática do curso 2011-2012;) Por certo, será a nosa derradeira xuntanza nese local, xa que en outubro voltaremos ao Centro Lug2 -mais disto falarémosvos noutra entrada...
A reunión versará sobre a falta de leite ou HIPOGALACTIA.
Existen varios motivos que poden, ben inhibir (hipogalactia total), ben reducir (hipogalactia parcial) a produción de leite materno, e que tedes enumerados neste documento:

Actualizacións de Diana West, IBCLC

Porén, os estudos e informes oficiais (p.e. o Plan Estratéxico para a Protección, Promoción e Apoio ao aleitamento en Europa) advirten reiteradamente que as preocupantes tasas de lactación materna se deben a unha falsa hipogalactia, derivada da falta de apoio social e institucional, tema sobre o que podedes ler máis aquí:

Artigo Inma Marcos
Artigo El club de la teta

Vides o vindeiro venres a falar de todo isto e das dúbidas sobre lactación materna que vos xurdan?

Agardámosvos!;)

Máis contos con tetas: MAXIA!

2011-09-20T15:04:00.000+02:00

Así se titula o libro ilustrado de Charo Pita e Madalena Matoso editado por OQO editora.

Nel Óscar, o curmán grande do bebé da Tía Elisa queda ao cargo deste, mentres ela vai á compra. Cando se pon a chorar e o curmán deduce que ten fame, pasea a vila enteira buscando algo que darlle de comer: na pastelaría, na horta, na granxa, na peixaría, na carnizaría… volvendo ao fin á casa da Tía Elisa, onde o avó a vai buscar para que lle dea de comer. E mentres Óscar mira as bolsas da compra agardando ver o que comen os bebés, a Tía Elisa as deixa pousadas, senta no sofá, desabotoa a blusa e fai Maxia!

E para nós foi toda una sorpresa descubrir que era un libro infantil no que o tema principal é a lactancia, pero tratado de xeito que os nenos que non tomaron teta aprenden sen máis que o que comen os bebés é teta e que ademáis os fai estar contentos e tranquilos e, para os nenos que si tomaron teta e se lembran é toda unha sorpresa chegar ó final e ver que para eles a resposta estaba ben clara, pero aínda así se sorprenden de velo nun libro.

E para min, para a mamá, que comparasen a teta con algo máxico é un punto a favor, porque está preto do que sentimos as nais ao saber que podemos criar a un bebé só co noso corpo -algo extraordinario sen deixar de ser algo cotián.

Ogallá que pouco a pouco e grazas a libros coma este ver un bebé tomando teta nun libro deixe de ser unha sorpresa :)

(ás miñas nenas, ademáis, lles encanta buscar os lugares por onde pasou Óscar nas últimas páxinas do libro :) )

Raquel

Lactancia e depresión

2011-09-16T09:16:00.001+02:00

Á vista do xeneralizado descoñecemento sobre este tema, queremos deixar constancia de tres ideas básicas, respaldadas pola evidencia científica:

1- A lactación materna protexe da depresión postparto na medida en que mellora o vínculo co bebé e proporciona á nai benestar físico (oxitocina mediante) e a satisfacción racional de estar a facer algo único, crucial e de enorme proveito para a vida daquel.

2- Os problemas co aleitamento, especialmente a dor continua e non tratada ou a sensación de "non poder" ou de "facelo mal" poden agravar ou precipitar unha depresión postparto. Polo tanto, é imprescindíbel tratar a dor e os problemas, resolvendo as súas causas o máis axiña posíbel e apoiando incondicionalmente á nai que aleita.

3- Nos casos de depresión diagnosticada e lactancia en curso, cómpre tratar á nai e, asemade, protexer e preservar a lactación materna. A compatibilidade dos medicamentos receitados pode consultarse aquí.

Saben moito máis estas dúas investigadoras:
Ibone Olza
Kathleen Kendall-Tackett

Proximamente... (reeditada)

2011-09-12T17:51:00.003+02:00

Agosto

- do 5 ao 31: exposición fotográfica en Foz
- día 19: obra de teatro

Setembro

- do 5 ao 29: exposición fotográfica en Burela
- día 11: asemblea extraordinaria
- día 30: reunión temática sobre a falta de leite

Outubro

- do 1 ao 8: Semana mundial da lactación materna
  Foz:
   Presentación do noso libro
   Cine para mamás e bebés
  Lugo:
   Exposición fotográfica
   Acto conmemorativo
- día 15: obradoiro Sentimentos de nais e pais
- día 28: reunión temática sobre o sono

Novembro

- día 5: obradoiro de masaxe infantil
- día 25: reunión temática sobre a alimentación complementaria

Decembro

- día 3: obradoiro de portabebés

Iremos informándovos destes actos máis polo miúdo aquí...
E velaquí un cartaz para enviar a quen pensedes que poidan interesar...
Graciñas mil!;)

Lactancia e cine IV

2011-09-09T09:30:00.001+02:00

Le lait des autres (Jacques Tréfouël, 2008)

O Morvan (do celta mor, negro, e vand, montaña) é un macizo
montañoso sito na rexión de Borgoña (Francia). Esta área, comeza dicindo o documental, "sempre foi considerada coma a terra do leite por excelencia. Xa os romanos deixaron constancia de que as galas de Bitracte mollaban os seus peitos nunha fonte do monte Beuvray para obter moito leite para aleitar a seus fillos. Dende entón, as descendentes cristiás destas mulleres estiveron moi solicitadas. En Dun-les-Places achouse a nodriza do rei de Roma. De Empury procedía a do fillo de Napoleón III. Esta predilección polas nodrizas do Morvan fixo que no século XIX se poblase de bebés recén nados"...
... até o punto de que París se baleirou de bebés, e as zonas de nodrizas se chamaron "o pequeno París".
Ao principio só as familias acomodadas facían uso das nodrizas, mais na época da Revolución industrial, mesmo se obrigou ás mulleres da clase obreira a mandar seus bebés ao campo durante os primeiros dous anos, para así cumprir con xornadas laborais agotadoras -o historiador que analiza este feito comentaba que eses bebés adoitaban ser enfermizos, debido á escaseza de médicos nas pequenas vilas, mais quizais a causa debamos buscar no sentimento de abandono e desvinculación que tiveron que experimentar.
O seguinte paso foi que as nodrizas viaxasen a París, para aleitar os bebés de familias ricas, deixando atrás os seus propios fillos e fillas e mais a súa parella. A viaxe dende o campo até a capital, coñecida como "purgatorio", facíana en condicións moi penosas, como tal denominación indica...
Dada a magnitude deste fenómeno, chegouse a regulalo. Esixíase ás nodrizas que se desen de alta na Prefectura de policía, facíaselles un exame médico e logo inscribíanse no Grand Bureau des Nourrices, creado en París no 1869.
Este traballo comezou desaparecer coa invención do leite de fórmula, que a poboación viu como algo moderno e beneficioso, se ben incrementou enormemente as taxas de mortalidade infantil... até o punto de que unha viñeta da época o denomina "o perigo branco"... algo que hoxe se consideraría politicamente incorrecto:(

Xenerosidade

2011-09-05T09:17:00.000+02:00

Esta fermosa foto, publicada nun xornal hindú, está nominada este ano ao prestixioso concurso de fotografía de National Geographic.
Agradecemos á nosa querida socia Rosa que nolo comunicase;)
(Por certo, os medios que difundiron esta nova citaban como fonte esta fermosa web, mais nela non consta a autoría da imaxe. Se a sabedes, dicídenola! Mil grazas...)

Aviso importante

2011-08-31T09:30:00.001+02:00

En setembro en Lugo continuamos as xuntanzas na Aula de Educación maternal do SERGAS (r/ Doutor García Portela 11 - baixo), no seguinte horario:
- días 9 e 30: de 17 a 19h
- días 2, 16 e 23: de 11 a 13h

Na asemblea do día 11 decidiremos se seguimos a nos reunir alí ou voltamos ao Centro Lug II...

... Manterémosvos informad@s!

Exposición en Burela

2011-08-29T10:01:00.000+02:00

En setembro poderedes gozar en Burela da exposición dos traballos do Concurso fotográfico de lactación materna de FEDEGALMA do ano 2009, acompañados de textos escritos por algunhas de nós, que de momento está en Foz até pasadomañá.

Teredes do 5 ao 29 de setembro para visitala, de luns a venres de 11 a 13 h e de 18 a 20 h e os sábados de 18 a 20h na Casa da Cultura de Burela. A entrada é libre e gratuíta.

Viredes, non si?;)

Cartaz

Un día no teatro

2011-08-26T11:13:00.000+02:00

Grazas á Deputación e a Palimoco. Pasámolo xenial!;)

Artigo na prensa local

Asemblea extraordinaria

2011-08-22T09:31:00.000+02:00

Convidamos a todas as socias (e ao socio) á asemblea extraordinaria que terá lugar no centro educativo Galén o domingo 11 de setembro ás 10:30 horas.

A orde do día será a seguinte:
- Programación das nosas vindeiras actividades (sinaladamente as da Semana mundial da lactación materna, que se celebrará a primeira semana de outubro)
- Debate sobre o financiamento da nosa asociación
- Rogos e preguntas

Gostariamos de contar coa vosa asistencia!

Un pouco de teatro

2011-08-12T18:00:00.000+02:00

O venres 19 agosto ás 11.30 no Museo provincial de Lugo (praza da Soidade, s/n) temos a sorte de contar cunha representación do espectáculo "Queres que cho conte?", obra baseada nunha escolma de contos populares, que serán narrados aos máis pequenos nunha mestura de música e teatro.
O acto correrá a cargo do grupo de teatro Palimoco e enmárcase na iniciativa Cultura sobre rodas da Deputación de Lugo, que persegue potenciar o tecido asociativo da nosa provincia.

A entrada, coma sempre, é libre e gratuíta...
... Animádevos a vir!

Cartaz

Exposición en Foz

2011-08-08T10:00:00.006+02:00

Este mes podedes gozar dunha fermosa exposición coas fotos do Concurso fotográfico de lactación materna de FEDEGALMA do ano 2009, acompañadas de textos escritos por algunhas de nós.

Tedes até o 31 de agosto para visitala, de luns a sábado de 9 a 14h e de 17 a 20h no Centro CENIMA de Foz. A entrada é libre e gratuíta.

Non vola perdades!;)

Cartaz

Amnesia colectiva

2011-08-05T11:17:00.000+02:00

Nestas vacacións tiven tempo de reflexionar por que a xente fita as nais lactantes...
Paseando pola praia observei que xa está socialmente aceptado que algunhas mulleres non levemos a parte de arriba do bikini. Porén, cando eu ía porteando e aleitando a miña filla as mais das persoas que nos cruzabamos nos miraban coma se estivesen a ver un dinosaurio ou unha pantasma...
E un día algo fixo clic na miña cabeciña e entendín por que semellante escea (que debería ser normal e cotiá) desencadeaba semellante reacción:

Vivimos nunha sociedade que esqueceu para que temos tetas.

(Mentres nos limitemos a amosalas, tolérase, mais se as empregamos para nutrir aos nosos fillos e ás nosas fillas (fóra da intimidade do noso fogar), xa non pasan inadvertidas...)

Susana

Postal mariñá

2011-08-01T15:21:00.000+02:00

Coa chegada de Bico de Leite á Mariña xorde un espazo onde poder aleitar e ver a outras nais aleitando, de forma natural, sen pudores nin medos, onde poder recibir a información e o apoio que moitas nais mariñás precisamos.
As xuntanzas adoitan ser moi participativas e enriquecedoras. Son pequenas mesas redondas compostas por nais de moi diversa índole (embarazadas, primeirizas con bebés moi pequechos, nais próximas a rematar a baixa maternal, a introducir a alimentación complementaria, nais con lactancias prolongadas...) que comparten as súas experiencias en torno á lactancia, o que acostuma ser de gran axuda para todos aqueles que se achegan a Bico de Leite por primeira vez con moitas dúbidas por resolver.
Estas xuntanzas axudan a cubrir un oco baleiro en moitas familias actuais, nas que se perdeu a cultura do aleitamento, servindo como punto de apoio ás nais para soterrar falsos mitos e crenzas producidas, na sua maioría, polo descoñecemento.

María José

Lactancia e cine III

2011-07-29T10:00:00.006+02:00

Bebés (Thomas Balmès, 2010)

Este documental segue a vida de catro bebés, durante o seu primeiro ano de vida, en diferentes lugares do mundo.
Nel temos a oportunidade de ver como transcorre o día a día destes nenos e nenas e de comparar como se relacionan co seu contorno de diferente xeito, segundo onde vivan...
... mais non queremos avanzarvos máis;) Simplemente comentarvos que a lactación materna tén (afortunadamente) unha importante presenza, sobre todo na vida do bebé namibio...

Web oficial

Lactancia e profesión médica

2011-07-25T10:00:00.004+02:00

Gran parte das dificultades polas que atravesa o mundo débense a que as persoas desinformadas están completamente seguras e as persoas informadas, cheas de dúbidas (Bertrand Russell)

Eu tiven a sorte, cando naceu meu primeiro fillo, de dar cunha pediatra pro-lactancia, pro-crianza con apego, inmunóloga, alergóloga e ademais puericultora.
Máis dunha vez saín da consulta cunha receita debidamente asinada e selada que puña: “Delle teta, toda a que poida”. Ela dicía que o da receita era para dar a sensación psicolóxica á nai de que o pediatra estaba “resolvendo” a súa inquedanza.
Dúbidas coa lactación, veña recomendarme o grupo de apoio. Dúbidas sobre choros, sono ou alimentación, veña recomendarme os libros do Carlos González.
Pois esa mesma doutora contoume un día que aos pediatras non se lles ensina cómo criar un neno san, senón cómo curar patoloxías, e que, polo tanto, un pediatra non sabe NADA da práctica da lactancia, senón só de fisioloxía. Que de práctica saben as nais experimentadas e mais os grupos de apoio.
Entón, que diremos de médicos de cabeceira, urólogos, etc... que saberán eles sobre o aleitamento? Por que dan en recomendar destetes ou cuestionar decisións que son, antes que nada, moi persoais?
Parecera que o levar a bata branca lles obriga a ter resposta para todo, mesmo para o que non lles preguntamos.
E se topan con algunha nai que XA tén as respostas que precisa, tómano coma que “en Internet dinse moitas cousas”, ou coma que “qué saben eses da OMS, que só estan alí sentados sen facer nada”...
O triste é cando dan con nais confusas, con dúbidas, que necesitan respostas acertadas, e o que reciben é un baleirado das súas propias experiencias e crenzas, dos seus prexuízos, vamos, desinformación en estado puro.
E esa nai sae da consulta coma se levase unha receita asinada e selada que di: “É unha parvada aleitar a miña filla de 18 meses”, “Teño que ir pensando en destetar a meu bebé de 9 meses”, “Hai que quitar o peito mentres tome antibiótico”, ou calquera outra barbaridade das que adoitan dicirse a cotío ás nais lactantes nas consultas.
É o poder que teñen as batas brancas.
A ver cándo as mulleres facemos valer o poder que temos coma nais.

Elimar

A falar da teta!

2011-07-22T10:00:00.009+02:00

As compañeiras de ALMA avísannos de que organizan, en colaboración con FEDEGALMA, un concurso de relatos sobre lactancia materna no que podemos tomar parte todas as nais galegas, contando as nosas experiencias, os nosos sentimentos ao aleitar...

Temos aínda tempo até o 31 de agosto do 2011... Participaremos, non si?;)

Máis información

O destete natural nos animais

2011-07-18T09:17:00.003+02:00

Tirando da miña deformación profesional coma veterinaria, hoxe quero escribir sobre un tema que adoita dar moito que falar e ser causa dalgunhas desavinzas familiares e sociais: o destete.

Cando e como destetar as crías ?

É normal que sigan mamando os pequenos cando xa andan, comen, falan, e mesmo van ao cole?

Como xa sabemos as posturas dos organismos oficiais prolactancia ... agora quero facer unha comparativa a título informativo co destete dos animais.
O primeiro é dicir que entre eles a variabilidade é tan ampla case coma entre nós, hai nais que mesmo se negan a aleitar as súas crías, o que non deixa de causarnos tristeza e incomprensión...
E hainas que destetan abruptamente, sen contemplacións, cando a elas lles parece, apartando os cachorros e fuxindo do seu contacto.
Isto é bastante común entre as cadelas, ás que os cadeliños adoitan trabar e deixarlles marcados os dentiños nas tetas, o cal non pode ser nada agradable de aturar.
En xeral, o destete coincide coa introdución da alimentación de adultos de forma plena, é dicir, os gatiños deixan a teta cando xa comen moito pienso para gatiños, os becerros destétanse de todo cando xa poden comer herba ou cereais...

Ou non??

Pois non. É moi frecuente que tanto gatiños coma becerros queiran seguir mamando moito mais alá de empezar a comer de todo. E o máis curioso se cadra é que moitas vacas e gatas non poñen impedimento en que o sigan facendo e continúan dándolles a teta... mesmo até a idade adulta.

Seguro que as/os que teñades relación coa gandeiría e o mundo rural e/ou os/as que criárades moitos gatos, isto xa o sabiades...

Dende tempo inmemorial utilízanse métodos e dispositivos coercitivos para evitar estas lactancias realmente prolongadas. Xeralmente colócase no fuciño dos buchos (ou máis frecuememente buchas) un aparello con pinchos cara arriba, de xeito que, ao ir mamar, crávanselle estas púas á vaca na ubre e polo tanto ela fuxe, patéao, e non lle permite aleitarse.
Arestora estes dispositivos veñen de fábrica con moi variados deseños e calidades e responden ao explícito e sinxelo nome de "ANTITETAS"...

Coma este blog non trata sobre o benestar animal nin sobre o papel da veterinaria na prevención do maltrato... non me extenderei na miña opinión ao respecto destes usos e costumes. Que cadaquén se faga a súa propia opinión.

Sinxelamente quería deixar constancia de que a lactancia e o destete poden ser tan complexos e involuntarios nos nosos semellantes mamíferos coma en nós.
Os animais domésticos tenden a sufrir os mesmos prexuízos que as mulleres e as nenas e nenos, e a cotío son sometidos a parecidos tratamentos condutistas e coercitivos...

Xa vedes, o destete a miúdo non é tan natural e espotáneo como se podería pensar... nin sequera nos animais.

Patricia

Concurso de carteis

2011-07-15T09:00:00.001+02:00

Se alguén de vós goza de dotes artísticas, ten aínda mes e medio para deseñar o cartel do Congreso de Fedalma 2012, que terá lugar en Águilas (Murcia) e cuxo lema será "Lactancia materna: un compromiso social".
Aquí podedes consultar as bases desta interesante iniciativa.

O leite materno está contaminado?

2011-07-08T12:00:00.000+02:00

  Onte saíu na televisión esta nova:
  "A causa da baixa calidade do esperma dos homes podería estar nos contaminantes que afectan ás nais, durante o embarazo e a lactancia. Analizouse leite materno de mulleres galegas e catalás e todos estaban contaminados por diversos tóxicos"
  Aquí temos un vello tema (hai estudios deste tipo en diversos países dende hai moitos moitos anos), sempre igual de mal tratado polos medios, e, o que é peor, polos propios investigadores. Que, no canto de poñer o dedo acusador nos contaminantes, o poñen no leite materno, que queda como o verdadeiro culpable dos males dos pequenos.

Pártese duns supostos verdadeiros:

-O leite é un marcador fiable da contaminación ambiental, porque leva unha mostra representativa da graxa da femia que o produce, e na graxa corporal acumúlanse case todos os tóxicos.
-Os tóxicos ambientais son abundantes na nosa sociedade industrial e nocivos para saúde. Moitos actúan como disruptores endocrinos, substituíndo ás hormonas e alterando a fisioloxía reprodutiva, entre outras.
-Os bebés nas súas primeiras etapas de crecemento, sobre todo intraútero, son especialmente sensíbeis a estes contaminantes.
-A calidade do semen e as taxas de fertilidade masculina están baixando a niveis preocupantes nas últimas décadas.

  Pero á vez ignóranse outros supostos igualmente certos e moi importantes para interpretar correctamente os resultados do estudo:

-As taxas de lactación materna dende hai case un século son tan baixas en todo o mundo que a maior parte da poboación apenas recibiu leite materno na súa infancia, ou non o recibiu en absoluto.
-O leite de vaca tamén ten unha alta concentración de contaminantes e tóxicos ambientais (que, non vos enganedes, non eliminan ao procesar o leite para adaptalo aos bebés).
-Ademais de carecer da grande maioría dos compoñentes normais do leite da propia especie, o leite artificial en si é malo para a saúde.

Polo tanto, a miña conclusión directa é que se cadra é mais ben a FALLA de leite humano o que podería estar causando esta epidemia de infertilidade, xunto coa elevada e preocupante concentración de tóxicos por contaminantes ambientais, tanto no aire que respiramos como na auga que bebemos, ou na totalidade dos alimentos que inxerimos ao longo da nosa vida.

  Daría risa se non fose que é para chorar, que xusto teñan que sinalar co dedo ao alimento máis natural e mellor adaptado ás nosas necesidades, o máis seguro, o máis nutritivo e o único que realmente nos protexe de enfermar: o leite humano.
Estaría ben que fixesen un estudo de verdade prospectivo e caso-control, no que diferenciasen a calidade do esperma (dentro duns anos) dos nenos alimentados con leite humano comparándoo co esperma dos nenos alimentados con leite de vaca modificado. Teño para min que o resultado non variaría grande cousa... aínda que se cadra saían peor parados os de leite artificial... Non vos sería a primeira vez...
En calquera caso, o que debería preocuparnos a todos, comezando por científicos e políticos, son os contaminantes e a súa orixe, como diminuílos e facer que desaparezan da cadea alimentaria, e non do leite materno, onde van parar en última instancia.

  Pero xa sabemos que descontaminar o ambiente dá moitos menos cartos que vender leite artificial e tratamentos de fertilidade...

Patricia

Unha oportunidade desaproveitada

2011-07-07T09:00:00.000+02:00

O pasado 16 de xuño aprobouse no Congreso a Lei de seguridade alimentaria e nutrición, que podedes consultar aquí.
É unha norma que desenvolve o dereito á saúde, recoñecido no artigo 43 da Constitución, que encomenda aos poderes públicos "organizar e tutelar a saúde pública mediante medidas preventivas e as prestacións e servizos precisos".
Trátase dunha lei ambiciosa, de contido moi variado... na que se obvia toda referencia á lactación materna, o cal é especialmente indignante en dous capítulos:
- Capítulo VII: Alimentación saudábel, actividade física e prevención da obesidade
Bótase de menos unha alusión á protección do aleitamento materno no ámbito das garderías e dos centros educativos, tendo en conta que hai anos que sabemos que o exceso de graxa e de proteína do leite de vaca contribúe ao sobrepeso dende a infancia...
- Capítulo VIII: Publicidade de alimentos
Esta era unha marabillosa ocasión (se os movementos pro lactancia tivésemos feito o noso traballo de presión social) para elevar a rango de lei as disposicións do Real decreto regulador dos preparados para lactantes (RD 867/2008 de 23 de mayo), constantemente vulnerado polos establecementos distribuidores de leite artificial...
En fin, trátase dunha lei controvertida noutros aspectos (non acadou o consenso nin das asociacións de empresarios nin das de consumidores), mais no tocante á lactación materna non é xa que sexa discutíbel, é que a obvia por completo, contribuíndo así a invisibilizala (aínda máis)...

Máis ca un congreso

2011-07-04T10:30:00.004+02:00

Onte volvín de Castelldefells. Coma "asesora en formación", esta foi a miña primeira vez nun congreso sobre lactación materna e, a verdade, foi toda unha experiencia...

Venres 1 de xullo
Comezamos co relatorio inaugural, un relatorio sen relator, xa que se trataba dunha fermosa presentación con reflexións filosóficas e históricas sobre a lactación materna e cos (moi emotivos) relatos de tres nais.
A continuación aprendemos (eu, moitísimo) sobre inmunidade e síntese do leite materno, coas doutoras Ana Martín e Catherine W. Genna.
Á tarde, tralas comunicacións de profesionais, rimos co sentido de humor de Carlos González falando da alimentación complementaria (aproveito para anunciarvos que as papillas teñen os días contados!) e gozamos das explicacións da neonatóloga Concha de Alba sobre o apego.

Sábado 2 de xullo
Este día tivemos a sorte de escoitar a Catherine W. Genna en dúas ocasións: pola mañá falounos da comunicación e da integración sensorial dos bebés e pola tarde das "bandeiras vermellas" é dicir, dos sinais, ben da nai, ben do bebé, aos que debemos estar atentas as asesoras. Catherine é unha recoñecida experta, unha excelente comunicadora e unha encantadora persoa. Aquí podedes vela coa nosa Patricia:

A media mañá Carmela Baeza ofreceunos unha intervención preciosa (unha das miñas preferidas) sobre lactación materna e sexualidade, á que seguiu unha mesa redonda sobre os grupos de apoio.
Comezamos a tarde coas comunicacións libres e unha das elixidas foi a de Patricia, sobre dous casos de hipogalactia, o cal é unha grande fachenda para Bico de leite! E para que compartades esta alegría connosco, velaquí unha fotiño:

A clausura do evento correu a cargo de Rosa Jové, que reflexionou sobre cómo coa lactación materna podemos mellorar a economía, o medio ambiente, a conciencia cidadá... o mundo, en definitiva...
... E isto era precisamente o que se respiraba neste evento:
   A pertenza a un movemento social imparábel
   A solidariedade entre nais
   O amor por nosos fillos e nosas fillas
   O valor dos sentimentos
   A sensación de que PODEMOS
... Vamos, que estou desexando que sexa o Congreso Fedalma do ano que vén!;)

Susana

Bo verán!

2011-06-30T09:19:00.000+02:00

Grazas, de corazón, por lernos, por comentar no Facebook, por apoiarnos...

Esperamos que gocedes das vacacións cos vosos peques!

NOTA: Lembrade que en xullo e agosto nos reuniremos na AULA DE EDUCACIÓN MATERNAL (r/ Doutor García Portela 11-baixo). En setembro volveremos xuntarnos no Centro Lug II...

De festa

2011-06-28T09:00:00.003+02:00

Como sabedes, o venres celebramos o comezo do verán cunha pequena merenda. Esta vez esquecimos a cámara:( mais Sebas Senande cedeunos amablemente esta foto (graciñas!), para que vexades o ben que o pasamos;)

Para ler ou agasallar...

2011-06-24T19:28:00.000+02:00

Por se precisades unha lectura para o verán... lembrámosvos que segue à venda o noso libro, "Cinco anos de Bicos... de leite", no que recollemos unha selección das consultas que contestamos por mail nos primeiros cinco anos de traxectoria da nosa asociación, clasificadas por temas. Podedes adquirilo nas nosas xuntanzas a un prezo de 10 euros e a recadación destinarase ás nosas actividades de promoción da lactación materna. Tamén o atoparedes en:
- Burela: Comercial Auma (libraría da igrexa)
- Foz: Libraría Ofifoz (avenida da Mariña 46)
- Lugo: Libraría Trama (avenida da Coruña 21)
Moitas grazas!

Cousas que nos din ás nais lactantes...

2011-06-20T09:00:00.001+02:00

Este pareceunos un tema interesante... Velaquí algúns exemplos:

Aínda tés leite?
Aínda lle dás a teta?/Até cando lle vas dar a teta?
Tes que comer/beber moito máis

Ocórrensenos moitas máis frases, mais preferimos que participedes as nais que nos estades a ler... Contádenos, que comentarios sobre a lactación atopades absurdos?

Festa de fin de curso

2011-06-17T10:30:00.000+02:00

O vindeiro venres 24 de 17 a 19h no noso local do Centro Lug II teremos a nosa festa-merendola de fin de curso!
Polo tanto, non daremos charla temática, simplemente falaremos das vosas dúbidas sobre lactación materna... e do que xurda;)
Socias, usuarias, amigas de Bico de leite... encantaríanos que viñésedes pasar un bo rato connosco, acompañadas das vosas parellas, dos vosos nenos e das vosas nenas... e de quen vos apeteza.
E aproveitamos para darvos tres avisos relativos ás nosas xuntanzas en xullo e agosto:
1- Non gozaremos do obradoiro da Tradescola - Mónica descansará de nós até setembro, que ben o merece;)
2- Non teremos reunións temáticas
3- Seguirémonos reunindo todos os venres, mais estes dous meses pecha o Centro Lug II, así que farémolo no noso antigo local, na AULA DE EDUCACIÓN MATERNAL (r/ Doutor García Portela 11-baixo). Agradecémosvos a difusión deste cambio de última hora entre as persoas interesadas.

Vémonos, non si?;)

Lactancia e celiaquía

2011-06-15T09:00:00.000+02:00

A enfermidade celíaca é un desorde autoinmune desencadeado pola inxesta de gluten de trigo e proteínas relacionadas da cebada e do centeo por persoas xeneticamente susceptíbeis.
Dunha banda, xa nos anos 50 descubriuse que o aleitamento materno adía a aparición desta doenza, tese confirmada por estudos posteriores.
Doutra banda, no 2002 comprobouse que a lactación materna tén un efecto protector fronte á celiaquía, se os bebés son aleitados ao tempo da introdución de alimentos con gluten, se ben as causas deste fenómeno seguen a indagarse.
Arestora sabemos, en definitiva, que esta doenza é máis frecuente nos bebés que foron alimentados con leite artificial: se o bebé inxire gluten e foi aleitado polo menos 3 meses, o risco de padecer celiaquía cae drasticamente (63%).

Así foi o noso obradoiro de porteo

2011-06-12T13:20:00.012+02:00

Velaquí un resumo do que aprendemos coa Marta:

- Primeiro explicounos os beneficios de levar así aos nosos fillos e ás nosas fillas...
. Dá confianza tanto ao bebé coma á persoa que o portea
. Favorece o sono e mais a saúde do bebé
. Facilita o aleitamento
. Permite facer outras tarefas sen desatender ao bebé
. Porteando non existen barreras arquitectónicas

- Logo vemos (e probamos) os seguintes tipos de portabebés...
. Fulares (elástico, semielástico e tecido)
. Bandolera
. Meitai
. Mochila ergonómica

Se queredes saber máis, aquí podedes consultar a guía da Rede Canguro... mais agora vexamos unhas fotos da parte práctica do obradoiro;)

MIL GRAZAS...
... á Marta (quedamos encantadas contigo!) -e á súa tía, que coidou da pequena Julia;)
... aos medios de comunicación que difundiron esta actividade
... ás estupendas organizadoras
... e, por suposto, ás persoas que asististes e participastes no obradoiro!

Lactancia e dieta vexetariana

2011-06-10T09:00:00.000+02:00

Velaquí as recomendacións de Julio Basulto neste tema:
1- Ter unha dieta variada, consumindo a menor cantidade posíbel de alimentos superfluos con pouco valor nutricional e priorizando o consumo de integrais, aceite de oliva, froitas, verduras, legumes e froitos secos.
2- Suplementar con vitamina B12, ben a partir de alimentos enriquecidos, ben a partir de suplementos.
3- Utilizar sal iodada e inxerir diariamente un suplemento de 200 microgramos de iodo.
4- Expoñerse ao sol de xeito moderado mais habitual, coa finalidade de sintetizar vitamina D.
5- Non abusar das algas, cuxo exceso de iodo podería prexudicar ao bebé ou á nai.

Lactancia de prematuros

2011-06-03T09:00:00.008+02:00

A lactación materna adáptase perfectamente ás necesidades nutricionais e emocionais dos bebés prematuros.
En canto ás primeiras, o leite materno é moi dixestíbel, específico da especie humana e protexe ao bebé fronte á enterocolite necrosante e ás infeccións nocosomiais, entre outras doenzas.
En canto ás segundas, cómpre ter en conta que o ideal sería que o hemisferio dereito (regulador das emocións) se desenvolvese no ventre materno, así que o bebé prematuro debe atoparse o máximo tempo posíbel en circunstancias semellantes ás da xestación (exteroxestación), o que implica lactación materna a demanda e contacto pel con pel. Así se garante o establecemento da relación de apego.
A separación precoz do recén nacido e a súa alimentación con leite de fórmula poñen en grave risco a súa saúde.
Coa finalidade de alertar disto, dúas asociacións que loitan por un nacemento respectado organizaron un cine-fórum para o vindeiro martes 7 de xuño. En Lugo celebrarase ás 18h no Salón de actos do Centro social Maruja Mallo (carril das Hortas s/n). Velaquí máis información sobre esta interesante iniciativa:
Tríptico
Vídeo promocional

Obradoiro de porteo na Mariña

2011-06-01T09:00:00.010+02:00

Para o sábado 11 de xuño organizamos un obradoiro de portabebés, que correrá a cargo da nosa amiga Marta, asesora de porteo, que nos explicará os beneficios de levar así a nosas fillas e a nosos fillos, os diferentes tipos de portabebés, cómo colocalos... e resolverá as nosas dúbidas neste tema.
Será ás 11h na Casa da Cultura de Burela.
Coma sempre, a entrada é libre e gratuíta, e os nenos e as nenas son benvidos.

Agardámosvos!!

Cartaz

Foto do obradoiro de primavera

2011-05-30T09:00:00.005+02:00

Este sábado 28 aprendemos moito no relatorio-obradoiro de autoestima.
Moitas grazas ás persoas que asististes a el e, en especial, a Carmen, por colaborar connosco!

Lactancia de múltiples II: unha experiencia

2011-05-28T12:08:00.000+02:00

Nesta segunda e derradeira entrega, a asesora Gema Cárcamo González, cofundadora e presidenta de Multilacta e nai de dúas parellas de xemelgos aleitados, fálanos de cómo o viviu...

Son nai de dúas parellas de xemelgos aleitados de 6 e 10 anos respectivamente. Tiven sorte coa miña lactancia materna, sempre tiven confianza cega nas miñas capacidades coma nai humana, portadora de mamas. Son coma calquera mamífero. Teño dous peitos para alimentar aos meus fillos. E de momento funcionaron moi ben.

Cando estaba embarazada dos maiores tiña unha inmensa ilusión por aleitalos. Coma calquera das nais na miña situación, tiven inquietudes que tentei de resolver con información. Daquela eu non tiña internet, unha ferramenta que hoxe é de grande axuda para moitas nais coma min, onde la falla de loxística pode traerche graves problemas, entre outros, deixarte desamparada ao non poder acudir a un grupo de apoio.

Así e todo, tiña a axuda dos libros. Eu merquei El gran libro de los gemelos, de Coks Feenstra, e, malia que a súa primeira edición non era moi extensa con respecto á lactación materna, todas aquelas figuriñas de mamás aleitando asemade motivábanme aínda máis. Este libro ensinoume os pormenores dos nenos nados de partos múltiples e grazas a el fun consciente do que me podía pasar e que me pasou.

Los maiores naceron con 37 semanas de xestación, maduriños mais pequenos. Entre eles había unha diferenza de case un kilo. O máis más pequeno pesou 1.595 gramos e o maior, aínda con bo peso, colleu unha infección polo longo tempo que estivo coa bolsa rota e porque ademais foi monitorizado por vía cefálica. Separáronme dos meus nenos e estiven 24 horas sen poder erguerme porque tiña unha cesárea.

Ninguén me preguntou se quería aleitar eninguén me animou a sacarme leite nesas 24 horas. Eu sentíame moi triste, a mamá a carón meu tiña un fermoso bebé e eu que tiña dous, non tiña ningún. Ás 24 horas ninguén me agardaba en Neonados, senón non me explico por qué non agardaron para que aleitase aos meus nenos. Cando os coñecín foi todo moi frío, aínda non podo crer que a emoción que pensaba tería non era o que finalmente sentín.

Mais o primeiro que si quixen facer foi collelos e aleitalos. Como Roberto xa tiña unha mamadeira de leite de fórmula dentro e o meu pequeniño estaba na incubadora e non podían sacalo, quedei desinflada. Púxenme tan pesada que me dixeron que pedise un sacaleites no control de puérperas, e déronme sacaleites de embude co que logrei sacar un vaso duns 180 ml en toda la noite. Digo que foi nun vaso porque ninguén me deu nada para recoller o leite, e á mañá seguinte obrigáronme a tirar o leite polo retrete, así que foi frustrante.

Volvín baixar ver aos meus fillos e aleitei ao meirande, que se colleu ao peito deseguido coma un campión. Mais ao máis pequeniño seguiron sen sacalo. Ninguén coñecía o método nai canguro (outubro do 2000). Fun facendo así, mais negueime a tirar co leite de novo, así que baixaba sacarma mesmo de madrugada, malia que me rifaban por facelo, porque tiña que descansar.

Déronme a alta só a min e quedaron alí os nenos. Aluguei un sacaleites e sacábame leite para levarlles aos meus nenos. Ao pouco tempo déronme ao maior, mais o máis pequeno chegou estar ingresado 21 días. Iso si, cando tiven a oportunidade enganei á enfermeira e díxenlle que aleitaba directamente ao meu pequeno. Prendeuse dunha forma sen igual. Tiven algunha fendiña que cedeu soa, debido á práctica do meniño.

O meu único erro foi comparar aos meus nenos cos dos demais. Así fixen a maior parte da lactación diferida, porque a miña veciña dáballe ao seu neno unha cantidade x de leite artificial, que eu case lles obrigaba a tomar. E criáronse divinamente, mais aínda me parecía pouco. Unha mastite deu ao traste coa miña lactancia, xa que non souben tratala e destetei con cinco meses e medio. A partires de entón os meus fillos comezaron unha intolerancia ás proteínas do leite de vaca que ninguén soubo diagnosticar até case un ano despois. Cando tentei de relactar foi tarde, nin tiña apoio nin os bebés se enganchaban.

Cos pequenos foi todo diferente. Eu xa sabía o que era un grupo de apoio á lactación materna e me formara de xeito autodidacta. Naceron co dobre de peso ca o seu irmán maior máis pequeño e estiveron comigo ás 4 horas da miña cesárea, porque me volveron a separar deles por mor do parto. Tiven certas molestias co peito ao empezar, que arranxei cambiando aos bebés de peito e deixándoos cun peito adxudicado sen rotación.

Ás poucas semanas tiven unha mastite infecciosa, posiblemente por moitas das cousas que me ocorreran. Non sei se tivo que ver algo un frenillo dun dous nenos, do que me advirtiu unha amiga e asesora de lactancia, mais podería ser o problema, quen sabe. Co tempo e mais o tratamento, a lactancia non volveu dar problemas.

Aleitaba moi a miúdo, case siempre asemade, para poder aproveitar o tempo. Daba a demanda miña cando tiña que ir buscar ou levar os maiores ao cole, ceaba cos maiores para deitarme e aleitar os pequenos, mentres o pai durmía aos maiores. O meu leito de matrimonio foi propiedade dos xemelgos, aos que comecei aleitar na cama a partir dos 3 meses, cando empecei manexar a lactancia simultánea deitada. Non o fixera antes porque non dera coa técnica adecuada.

Grazas a aleitar deitada botei unha siesta duns 20-30 minutos cada vez que daba teta na casa. Pola noite ninguén espertaba, todos durmían ou mamaban. Tivemos folgas de lactancia, feridas por algún dente roto, unha molesta espinilla no peito e discusións por cambiar de teta. Aos catro anos e 9 meses decidimos de mutuo acuerdo deixar a teta, e a única que o pasou verdadeiramente mal fun eu, que aínda teño morriña daqueles tempos tan bonitos. Xamais tomaron suplemento, agás un día no hospital que eu non puiden ir porque estaba destrozada despois do ingreso dos piratas pequenos por ictericia por histoimcompatibilidad.

Lactancia e cine II

2011-05-22T11:00:00.001+02:00

Azur e Asmar (Michel Ocelot, 2006)

Esta fermosa película de animación comeza cunha escea de lactación materna: unha nodriza árabe está a aleitar ao seu fillo Asmar e mais a Azur, fillo dun nobre francés viúvo. Coida ambos os dous nenos co mesmo agarimo: cántalles cancións, lelles contos... Un destes fala dunha fermosa fada, cuxa búsqueda emprenden os irmáns de leite ao facerse mozos...
Non vos contamos máis, para que a vexades, que paga a pena!;)

Ao fío disto preguntamos ás nosas socias polo tema dos irmáns de leite e velaquí o que nos contestaron...

Xiana
A miña sogra tivo unha irmá de leite, pero por desgraza non se criaron xuntas, senón que súa nai marchou traballar de nodriza á Coruña e deixouna en Lugo ao coidado de parentes, sen teta e sen nai:( Anos despois nunca tivo reparo en afirmar que ela quería á súa filla de leite, a quen criara mais non parira... moi comprensible, e moi triste...

Sonsoles
O outro día estaba atendendo un cliente coa nena colgada da teta... O home contábame tan traquilamente as súas desventuras, informábase da posibilidade de pleitear por unhas fincas... E despois chorába emocionado falando dun irmán de teta (un neno que aleitara súa nai canda el) ao que quería moito.... Ai a teta....:)

Julia
A min miña avoa contábame que a ela lle dera leite outra muller que non era súa nai. Agora sinto non terlle prestado máis atención. O estrano deste caso é que miña avoa non era de boa casa (seus pais eran caseiros), e a muller que lle daba leite era das familias máis ricas do pobo, de feito, a que foi irmá de leite de miña avoa (nacida no 1912) estudou para mestra e aínda me deu a min clase.

Montse
Eu teño dúas historias:
Miña nai aleitou a meu irmán e mais a un sonriño de meu pai. Miña tía traballaba e miña avoa paterna (que coidaba do bebé) pediulle a miña nai (entón vivían xuntos) que aleitara ao meu curmán. A miña nai caíalle o leite do outro peito mentres mamaba meu irmán, que se alimentou só de LM até os 13 meses.
E a outra historia é a da miña avoa materna, que compartían leite ela e mais a súa comadre para os nenos. Eu enteireime de nena, cando un dos bebés, que agora está en Arxentina, veu pasar unhas vacacións e deu con un dos meus tíos e díxolle que xamais permitise que maldicisen o leite que mamaron, xa que foi o mesmo...

Precisamente o vindeiro venres preséntase un libro infantil sobre este tema...

...aínda que a capital nos queda un pouco lonxe;)

Reunión temática de maio

2011-05-20T09:00:00.000+02:00

O venres 27 dirixiremos a nosa xuntanza temática ás futuras nais e aos futuros pais.
Cremos que xa durante o embarazo convén informarse sobre lactación materna e sobre cómo a vivencia do parto inflúe no aleitamento. Precisamente mañá pola mañá, co gallo da Semana mundial do parto respectado, a asociación El parto es nuestro, que vela polos dereitos do nacemento, colocará unha mesa informativa na praza Maior.
Volvendo á nosa xuntanza do día 27, nela tamén resolveremos outras dúbidas sobre lactancia e será de 17 a 19 h no noso local do Centro Lug II. Ao comezo da reunión haberá, na sá contigua e grazas á colaboración da Tradescola, un obradoiro infantil de cultura tradicional para que non se aburran os pequenos e mais as pequenas;)
Só un aviso máis... Lembrade que ao día seguinte (sábado 28) teremos o obradoiro de autoestima para nais...

Vémonos!!!

Información

Presentación do noso libro "5 anos de Bicos....de Leite"

2011-05-19T10:52:00.005+02:00

Aqui tendes as fotos da presentación de onte do noso libro "5 anos de Bicos.....de Leite", grazas a toda a organización porque foi un acto ben bonito, e grazas tamén a todos os asistentes, por achegarnos o seu agarimo e amor.

Na Semana do libro...

2011-05-17T12:27:00.000+02:00

... lembrámosvos que mañá ás 18h presentamos o noso manual na sé luguesa da Fundación Novacaixagalicia. Nela falaremos da nosa asociación e leremos algunhas consultas, todo amenizado cun pouquiño de música... A entrada é libre e gratuíta -animádevos a vir!
Tamén estamos a preparar outra presentación na Mariña, da cal vos informaremos no seu momento...

Lactancia de múltiples I

2011-05-13T09:00:00.000+02:00

Nestes casos é especialmente importante que as nais atopemos axuda para todo o que non sexa coidar dos xemelgos e que nos informemos sobre lactación materna e sobre técnicas para aleitar aos dous asemade.
A muller que opta pola lactación de múltiples adoita atopar resistencias no seu entorno, así que o apoio nos grupos de nais é fundamental.
Para esta entrada temos a gran sorte de contar coas palabras da asesora Gema Cárcamo González, cofundadora e presidenta de Multilacta, primeiro grupo en España especializado en lactación con xemelgos ou máis múltiples, e nai de dúas parellas de xemelgos aleitados. Velaquí o que diría as nais que vos atopades nesta situación...

Vas ser nai de múltiples? Os primeiros meses estarías ocupada asimilando a nova de que vas ter máis dun bebé. O primeiro impacto emocional leva un tempo, no que só nos interesamos polo desenvolvemento do embarazo, deixando de lado outras cuestións importantes, coma a lactación materna.
Se xa che plantexaches a cuestión, unha das primeiras preguntas é: terei leite dabondo? E outra: serei quen de organizarme para chegar a todo?
As mamás de múltiples non están incapacitadas para aleitar aos seus bebés. Como calquera outra muller dispoñen de dous peitos, e se pensaches aleitar é porque coñeces o beneficio extra que tén o leite materno para bebés tan pequenos e ás veces inmaduros, como o son moitos xemelgos ou trillizos. Algúns deles precisan ao comezo un pequeño suplemento, mais nada que non se poida arranxar conforme van crecendo, facéndose máis fortes e mamando mellor.
Coma no resto de mulleres, moi poucas mamás teñen verdadeiros problemas para aleitar a máis de un. Mesmo se recorreches á reprodución asistida, isto non significa que a lactación sexa imposíbel, mais pode precisar de máis axuda.
Que che formules as devanditas preguntas é fundamental, porque pode axudarche disipar moitas destas dúbidas e conseguir ferramentas clave para un comezo axeitado do aleitamento. Arestora con información nada é imposíbel e é importante para tomar decisións responsábeis.
Se desexas aleitar, só cómpre que te rodees de suficiente información e apoio dabondo. Para iso existimos os grupos de apoio á lactación materna, porque ninguén mellor que as propias nais de xemelgos aleitados tén experiencia suficiente para entenderte e axudarte. Nos grupos adoita haber algunha nai de múltiples.
Algunas nais pensan que para ter éxito coa lactación de xemelgos ou máis bebés cómpre un suministro de leite total y suficiente para todos. Abofé que é a primeira idea de todas as nais, mais non podemos asegurar que esta expectativa se poida cumprir en todos os casos, así que proporse simplemente pequenos logros, coma iniciar o aleitamento e que os bebés mamen con eficacia, xa é un grande éxito. Pouco a pouco, o tempo dirá...
A perseverancia e mais a confianza nas nosas capacidades coma nais e o apoio dos sistemas ao noso redor poden garantir que a lactación materna siga a funcionar, sen importar demasiado se os bebés toman só leite materno ou precisan suplemento. Mais como conseguir esa confianza e seguridade no que estamos a facer? Coñecendo o noso corpo, os nosos bebés, cómo funciona a lactación materna, qué elementos poden dificultar o proceso e estratexias para sortealos y tendo a man os recursos, coma os grupos de apoio.
Para aleitar a xemelgos ou máis necesitaremos sobre todo información e motivación, responsabilidade familiar e profesional.
Non che podemos garantir que os bebés poidan ser recibidos coma o sería un só bebé, pois iso depende de moitos factores, coma o seu peso, a súa idade xestacional, o tipo de nacemento... Unha cesárea pode provocar pequenas dificultades para iniciar a lactación, derivadas da separación entre nai-bebés, habitual neste tipo de partos. O que si che podemos asegurar é que, cun bo estado de saúde da nai, o aleitamento non debería dar problemas.
Debes saber que a natureza non trae xemelgos ou máis bebés sen unha garantía para alimentalos. Non te deixa abandonada sen solucións:
• A presenza de máis dunha placenta no útero aporta á nai a posibilidade de maior cantidade de hormonas necesarias para desenvolver peitos aptos para producir leite para máis dun bebé.
• O aleitamento de máis dun bebé incrementa o baleirado das mamas e mellora a produción de leite en condicións de sución eficaz.
• A alta frecuencia das tomas asegura que os niveis de prolactina e de creación de receptores hormonais concretos sexan sempre altos e axuda á produción.
• A lactación simultánea de ambos os dous peitos eleva os niveis de prolactina, hormona que sintetiza o leite materno.
O problema co que decotío dan as nais de xemelgos é a falla de axuda para poder soportar a alta demanda de dous ou máis bebés. Aleitándoos asemade podemos reducir considerablemente o tempo das tomas, mais podemos falar tranquilamente dunhas 15 ao día. O grupo pode ensinarche a colocar aos bebés simultaneamente desde os primeiros días. Podes aleitar deitada para descansar durante as tomas, descargando así o solo pélvico despois de tanto peso no ventre.
A nai necesita no fogar alguén que a atenda e lle permita facer as tomas sen se preocupar doutras tareas. Algunhas nais prefiren investir nunha persoa que lles bote unha man nas horas en que poden estar máis soas e outras invisten en leite de fórmula para combinar unha lactación materna que se limita por necesidades persoais. Trátase simplemente de que gocedes do momento, sen pensar na cantidade de leite, senón na calidade da lactancia e o que vos proporciona a todos. Calquera variante que utilices para aleitar a teus fillos ou fillas será a mellor.

Obradoiro de primavera

2011-05-08T10:00:00.000+02:00

Comprácenos moito presentarvos esta actividade e esperamos que sexa do voso interese. Trátase dun relatorio-obradoiro sobre AUTOESTIMA DA NAI. Eliximos este tema porque temos constatado que a situación emocional da muller inflúe dun xeito determinante no éxito do aleitamento.
Terá lugar no Colexio Galén o sábado 28 de maio a partir das 11 horas (duración aproximada: hora e media).
Será impartido por Carmen Sirvent Artiaga, unha marabillosa terapeuta humanista de exquisita intuición e ampla experiencia, especializada en maternidade e psicoloxía infantil.
A entrada é libre e gratuíta. Non volo perdades!

Cartaz

Fotos da nosa festa

2011-05-07T15:51:00.005+02:00

Como se ve nas fotos, pasámolo xenial;)
Grazas a todas as persoas que compartistes esta divertida mañá connosco!

Cambio de lugar da festa deste sábado

2011-05-05T09:00:00.000+02:00

Á vista do prognóstico de choiva para o sábado 7, decidimos celebrar a festa do noso certame de debuxo sobre lactación materna no Museo provincial (praza da Soidade, s/n).
Lembrade que gozaremos do obradoiro de baile dos Pesdélán... Agardámosvos!!!

Cartaz

Aquí ten uns agasallos para o bebé

2011-05-04T09:00:00.001+02:00

Esa foi a frase coa cal me foron entregadas un par de caixiñas chulísimas no hospital antes de me dar a alta.
Unha vez na casa, descubrín que os agasallos en cuestión non eran máis que unha efectiva técnica de comercio de diversas marcas, con diferentes produtos. Nas caixas viñan: cueiros e toalliñas, un biberón, un babeiro, dúas botellas de auga mineral de marcas diferentes (moi moi axeitadas para a preparación de biberóns), unha caixiña de cereais integrais (para que mamá recupere a figura canto antes mellor), mostra de crema cosmética para mamá, un mini kit de crema para o corpo, xabrón e pomada anti roibéns do cuíño, dúas revistas de "crianza" e un talón de subscrición gratuíta, así como outros similares para subscribirse a unha colección de libros de contos.
Hai que dicir que xa non entregan mostras gratuítas de leites de fórmula. Mais en troques entregan un catálogo completo das fórmulas dispoñibles no mercado, de leites de continuación, papillas, tarrinas, auga mineral, biberóns, chupetes, tronas, cadeiras de paseo, cadeiras para o coche, roupa, calzado, etc. Soa esaxerado, así que, velaquí algunhas fotos:

Boh, o de catalógos estouno a poñer eu. Eles póñenlles formato de revistas de crianza e engádenlle os clásicos artigos con consellos para coidar o bebé.
Está claro que saben onde buscar a súa clientela potencial, e están no seu dereito de vender, pero non ao custo de seguir fomentando a desinformación con frases como "Existen casos nos que a lactación materna non é posible", que lles serven de preludio para iniciar a súa oferta de produtos.
Estas frases, sumadas ás imaxes de nais dando biberón (non a teta), fan que a mensaxe sexa a de sempre: "O leite materno é o mellor -pero como non sempre se pode- o normal é criar con biberón e mira que sans e contentos están eses bebés". Co consecuente prexuízo de máis e máis nais sen a capacidade de tomar as súas propias decisións de xeito informado, e en vez diso, "comprando" o que nos seguen vendendo, filosofica e literalmente falando.
Creo que para equilibrar as cousas, hospitais e profesionais da saúde terían que ser igualmente receptivos a difundir a información proporcionada polos que defendemos o dereito de nais e bebés a gozar do aleitamento materno.

Elimar

NOTA: Como temos unha responsabilidade coas familias que nos ledes e esta é, por motivos económicos, unha materia pouco divulgada, aquí vos deixamos un estudo (en catro capítulos) sobre os riscos da lactancia artificial:
1 2 3 4
Grazas por difundir esta información.

Feliz día da nai!

2011-05-01T10:32:00.003+02:00

Parabéns a todas!
Moitos bicos de leite;)

Colo e teta

2011-04-29T09:22:00.000+02:00

O tempo de ter ao voso bebé no colo, xunto ao peito, na cama, é moi curto en relación coa vida total do voso fillo. Así e todo, nel a lembranza do voso amor e disponibilidade duran toda a vida (William Sears)

Denomínase exteroxestación ao primeiro ano de vida dos nosos bebés, no que eles precisan continuar vivindo nas mesmas condicións que no útero, o que se traduce en lactación materna a demanda e contacto físico constante.
Isto débese a que as crías humanas nacen prematuramente. Para que viñesen ao mundo co mesmo grao de desenvolvemento que especies semellantes, o embarazo debería durar 21 meses, mais se así fose, a cabeza do bebé non cabería polo canle de parto, que se estreitou como consecuencia da bipedestación.
Se queredes saber máis...
"Nuestros hijos y nosotros" (Meredith Small)
"El concepto de continuum" (Jean Liedoff)
Entrevista a Sue Gerhardt

Reunión temática de abril

2011-04-24T10:05:00.000+02:00

O derradeiro venres de abril dedicaremos a nosa xuntanza temática mensual ao DESTETE.
Xa sabedes que a OMS recomenda a lactación materna até os dous anos como mínimo e, despois, até que a nai e mais o neno ou nena queiran.
A idade en que o neno ou nena deixa de mamar de xeito espontáneo é variábel. En todo caso, cando chega ese momento, a nai adoita ter sentimentos ambivalentes: dunha banda, sente fachenda por ter cumprido a súa función, mais doutra, sente mágoa porque bota de menos os momentos do aleitamento.
Non obstante, tamén hai situacións nas que a nai, por diversos motivos, desexa destetar. Nelas recoméndase "non ofrecer e non negar", coa finalidade de que o destete sexa paulatino e respetuoso co neno ou nena, xa que se trata dun gran cambio, tanto desde a perspectiva nutricional como emocional.
Aquí tendes información máis polo miúdo.
Lembrámosvos que, sexa como sexa o voso destete, natural ou dirixido, podedes buscar apoio na nosa asociación.
Deste tema falaremos máis ampliamente o venres 29. Coma sempre, tamén resolveremos as vosas dúbidas sobre outros aspectos da lactación materna.
Será de 17 a 19 h no noso local do Centro Lug II. Ao comezo da reunión haberá, na sá contigua e grazas á colaboración da Tradescola, un obradoiro infantil de cultura tradicional para que non se aburran os pequenos e pequenas;)
Agardámosvos!

No Día do libro...

2011-04-23T10:00:00.001+02:00

Bico de leite
Bico de nai
Pinga de amor

5 Anos de apoio á lactancia materna
dende este grupo de NAIS
que DEMOS, DAMOS E DAREMOS
O NOSO AGASALLO MÁIS GUSTOSO
O NOSO MELLOR MIMIÑO
O NOSO MELLOR CONSOLO
O NOSO OURO BRANCO

Nesta curta pero intensa andaina, acompañáronnos outras nais que confiaron en nós para compartir as suás inquedanzas e dificultades, e coas nosas vivencias e mais o noso apoio puideron gozar do pracer de aleitar.
Este libro é a nosa homenaxe a todas elas, onde se plasmaron algunhas desas consultas, coa intención de axudar a quen o lea, porque aleitar non só é o natural, senón que tamén é o máis fermoso e O MELLOR.

Con este fermoso texto da Montse, a nosa asesora en Foz, anunciamos, con moita ilusión, a publicación do noso libro, "Cinco anos de Bicos... de leite", no que recollemos unha selección das consultas que contestamos por mail nos primeiros cinco anos de traxectoria da nosa asociación, clasificadas por temas.
Coidamos, polo tanto, que pode ser unha ferramenta ben útil tanto para nais lactantes como para profesionais.
Informámovos que o podedes adquirir nas nosas xuntanzas a un prezo de 10 euros e que a recadación destinarase ás nosas actividades de promoción da lactación materna. Tamén o atoparedes en:
- Burela: Comercial Auma (libraría da igrexa)
- Foz: Libraría Ofifoz (avenida da Mariña 46)
- Lugo: Libraría Trama (avenida da Coruña 21)
Presentarémolo o mércores 18 de maio ás 18 horas no Salón de actos da Fundación Novacaixagalicia, sito na praza Santa María...

... Encantaríanos que viñésedes!

Cartaz

Interesante relatorio

2011-04-20T10:00:00.000+02:00

O martes 26 de abril ás 19:30 no Centro de convivencia Maruja Mallo impartirase, dentro do programa Preto de ti, o relatorio "Lexislación en materia de corresponsabilidade", que versará sobre permisos e outras medidas de conciliación laboral e familiar. Consideramos fundamental coñecer e exercer os nosos dereitos neste ámbito, coa finalidade de pasar máis tempo cos nosos fillos e fillas. Ides ir?

Lactancia e dó

2011-04-18T10:53:00.001+02:00

Nesta entrada contamos cunha colaboración de luxo, a de Susana Cenalmor, asesora de Bbtta e, como nos di ela: nai de dous nenos, un bebé estrela dende abril 2009 e outro que é a nosa luz dende agosto 2010, enfermeira, apaixoada da lactancia, epenera dende hai pouco mais no fondo epenera de toda a vida...

Cando empezaches interesarte por este tema?

Comecei interesarme pola lactación materna estudando enfermeiría no derradeiro curso, tiven a sorte de facer prácticas cunha grande matroa e muller á que debo moito. O que nos ensinaban na escola distaba moito do que vía que facía ela coas mulleres na súa consulta... Escoitaba, asentía, entendía e apoiaba ás nais... Non tiña nada que ver co que se ensinaba sobre aleitamento na universidade. Gostei dese tipo de acompañamento... Fascinoume o sinxelo que pode ser algo que a sociedade empeñouse en complicar.
Anos despois, coas voltas que dá a vida, o destino achegoume outra vez á lactancia e empecei por fin a formarme, asemade que agardaba o nacemento do meu primeiro fillo.
Gabriel naceu e marchou aos tres días de vida. Deixándome cos peitos cheos e os brazos baleiros... Perdíamos así as ilusións, os proxectos, os cimentos... Perdíamolo todo... Perder esa lactancia soñada tamén supuxo un dó. Agora, dous anos despois, coas feridas bastante cicatrizadas, decátome do que necesitaba daquela e do que poden precisar outras nais que ven en situacións semellantes.

Cres que as nais adoitan compartir esta experiencia nos grupos de apoio?

Non é unha experiencia que se comparta abertamente nos grupos de apoio. O certo é que é un tema do que se fala de maneira franca en poucos lugares... Estamos a falar dun tabú de tabúes... De feito, existe algún nome para esa subida do leite trala perda? Peitos cheos... brazos baleiros.

Cando si acoden a vós, que lles aconsellades?

Cando unha mamá perde a seu fillo, a sociedade trata de pensar por ela. O médico dalle unhas pastillas para "cortar o leite" e non se fala máis do tema... Esas pastillas adóitanse dar máis tarde do que se debería e sen información... Moitas veces ninguén pensa en que pode haber outro fillo lactando...
Considero que a inhibición farmacolóxica da lactación é unha opción perfectamente válida, mais é a muller a que debe decidir, con todas as cartas sobre a mesa. Frecuentemente esas nais chegan ás súas casas e dan con que a inhibición, que pensaban sería inmediata, non o é. Ninguén lles explicou que é moi probábel que precisen extraerse leite para aliviar a tensión, é un pensamiento frecuente o "Funciono mal, o meu corpo perdeu meu fillo e as pastillas que me deron non me funcionan... Son eu a que está estragada".
Namentres os peitos vanse ingurxitando...
A lactancia pode inhibirse ademais dun xeito fisiolóxico: os peitos deixan gradualmente de producir leite e a nai extrae leite para manter o seu confort. Esta inhibición pode durar de unha a varias semanas.
Nambas as dúas opcións, estas mulleres necesitarán información e apoio para decidir qué facer e, unha vez decidido, cómo facelo.
A atención sociosanitaria neste tema é, de momento, bastante deficiente. Así e todo, nos últimos anos destapouse o veo e empézase a falar disto... Comeza haber unha conciencia social que até o de agora era inexistente polo silencio... Xa o dixemos antes: existe un nome para a subida do leite cando non hai bebé?

Para máis información:
Bibliografía
Foro SUA
Siempre en el corazón

Festa do certame de debuxo

2011-04-15T13:00:00.008+02:00

Hoxe fomos recoller os traballos presentados ao noso certame de debuxo sobre lactación materna, no que participan 113 nenos e nenas de catro colexios:
CEIP Luis Pimentel (Lugo)
CEIP Baamonde
CEIP Begonte
CEIP Castro Riberas de Lea
Agradecemos ben a estes catro centros que acollesen tal iniciativa, cuxa finalidade é a normalización do aleitamento.
Pecharemos esta actividade cunha festiña -como debe ser;) Nela entregaremos os diplomas e mais os agasallos e expoñeremos todos os debuxos. Celebrarémola o sábado 7 de maio ás 12 horas nos xardíns da Deputación de Lugo. De haber prognóstico de chuvia, avisaremos con antelación do cambio de lugar.
Para amenizar a festa, temos a sorte de contar coa música dos PESDELÁN -non volo perdades!

Máis sobre a SMLM 2011

2011-04-11T15:37:00.007+02:00

Xa vos avanzáramos que a Alianza mundial pola lactancia elixira o lema da Semana mundial da lactancia materna 2011: "Comunícate! Lactancia materna: unha experiencia 3D"...

Pois ben, o devandito organismo vén de publicar dous documentos interesantes:
- Tríptico
- Bases do concurso fotográfico
O prazo de entrega de traballos ao certame da WABA remata o vindeiro venres 15 de abril. Así e todo... aínda estades a tempo de participar!;)

Normal ou superior?

2011-04-06T09:00:00.003+02:00

Que estamos a facer mal na promoción e protección da lactación materna?

Aleitar os fillos é o normal, tanto como enxendralos, xestalos e parilos... vén sendo o seguinte paso natural...
A que vén logo tanto rebumbio co tema? Que foi o que aconteceu para que teñamos que estar teima que teima con que “o peito é o mellor” -“breast is best”, como din os anglófonos...
O peito non é “o mellor” porque é o NORMAL...
Que pasa logo co biberón? En que lugar queda, se o miramos deste xeito? Pois semella sinxelo: o leite artificial é peor, máis ben MOITO PEOR...
Pode parecer un leve matiz semántico, unha forma de dicir o mesmo, mais nada máis lonxe da realidade... Estamos a dicir case o contrario, poñemos o normal como anormal e viceversa.
Son xa décadas de terxiversar a realidade, de non mencionar o leite artificial por non falar mal del en aras do “politicamente correcto”, para protexer as supostas sensibilidades das familias que o utilizan, pero en realidade protexendo os intereses das grandes multinacionais farmacéuticas que o venden, xa son anos de máis de facer estudos sobre o leite materno coma se fose obxecto de investigación, coma se fose algo raro, excepcional, extraordinario, coma un ideal, case unha utopía... á beira do outro, do normal, do común e corrente: da lactancia artificial...
Logo estamos tolos? O raro é darlle leite de vaca modificada aos bebés humanos, ese é o experimento, ese é o obxecto de investigación! O patrón, o control co que hai que comparalo é o leite materno... Polo tanto, os estudos -miles ou centos de miles- que falan da “redución de riscos”, “da menor probabilidade” de contraer doenzas tomando e dando leite materno no canto de leite artificial, están expresados xusto ao revés:
É que é o leite artificial o que aumenta os riscos de contraer múltiples enfermidades... A estas alturas xa non colle a menor dúbida de que o leite artifical é netamente malo para a saúde de nais e bebés. Así de claro.
E logo, diredes, non era que se criaban igual?? “Pois eu tomei biberón e estou moi san” ou “O neno da veciña toma teta e é moi enfermizo”... Abofé, casos particulares haberá milleiros, pero estamos a falar de ciencia e de saúde pública, e o menos que podían facer as autoridades sanitarias é falar claro e tentar de verdade protexer aos máis indefensos.
Anos de campañas antitabaco (moitas realmente agresivas) por fin comezan dar os seus froitos... Cando eu era nena, era normal que os pais fumasen diante dos pequenos, na casa, nos coches, en todas partes.. Hoxe xa non o é. Bueno, normal nunca foi, só o parecía... por costume e repetición. Estaba socialmente aceptado, igual que hoxe o biberón, moitas similitudes...
Campañas antitabaco, campañas antidrogas , campañas de “prevención“ -mentira, de detección precoz- do cancro de mama, de colon...etc, etc..
Para cando, pregúntome, para cando unha campaña de prevención do uso do leite artificial??
Iso é o que funcionaría, iso é o que toca. As campañas de promoción de respirar aire puro, igual que as campañas de promoción da lactancia materna, resultan ñoñas, absurdas e inefectivas... Aínda que, se o miramos ben, practicamente non hai nin campañas das inefectivas a nivel institucional... Demasiados intereses comerciales en xogo , me temo.
Dar leite artificial aos meniños non é normal e tería xa que deixar de parecelo, o primeiro paso é dicilo claramente...
Por desgraza, se o dicimos, colectivos como o noso estamos abocados ao rexeitamento social, a ser tildadas de extremistas, de esaxeradas, de querer “facer sentir culpables ás nais” (sic)...
É, polo tanto, unha tarefa ingrata de máis para nós, que preferimos ser axuda, apoio nai a nai, normalización. E mesmo, se cadra, facer a parte ñoña e inefectiva da promoción...
As campañas de saúde pública, que as fagan as autoridades, nós tentamos lembrarllo cada día a quen corresponda.

Patricia López Izquierdo
Presidenta de Bico de leite

Ampliación da redución de xornada

2011-04-01T10:10:00.000+02:00

O artigo 37,5 do Estatuto dos traballadores dispón:
"Quen por razóns de garda legal teña ao seu coidado directo algún menor de 8 anos ou unha persoa con discapacidade fisica, psíquica ou sensorial, que non exerza actividade retribuída, terá dereito a unha redución da xornada de traballo, coa diminución proporcional do salario, de entre un oitavo e a metade da súa duración".
Moitas persoas gozan xa desta posibilidade, coa finalidade de pasar máis tempo con seus fillos e súas fillas. Agora está en marcha unha petición para ampliar a súa duración a 12 anos, que podedes asinar aquí.
Grazas pola vosa colaboración!

Excesos varios

2011-03-30T09:05:00.000+02:00

O único que precisa un bebé son unha nai e mais un pai dispostos a cambiar (Laura Gutman)

Eu son Susana e teño unha nena de case ano e medio, o cal me permite ver con claridade a morea de obxectos superfluos que acumulei para o seu nacemento:
- Berce (durme connosco desde a alta hospitalaria)
- Carriño (aparqueino cando ela tiña seis semanas e descubrín os portabebés)
- Hamaca (que imita o balanceo do camiñar materno -os bebés prefiren o orixinal!)
- Mamadeiras e chupetes (usamos a teta para todo)
- Cantidades inxentes de roupa (cando, aínda hoxe, pasa a maior parte do tempo en pixama)
- Babeiros e puchos (non os atura)
- Xoguetes con moitas luces e sons (e o que realmente a apaixoa son os botes, os cargadores de móbil e mais as pinzas da roupa)
- Caixas de publicidade e mostras que nos deron nos cursos de educación maternal (e xa postos, o tempo que invertín asistindo a eles...)
- Consellos infundados, non pedidos e contradictorios entre sí
Máis adiante aínda me insistiron en que mercase andador, parqueciño e cadeira de paseo... Mais xa non caín;)

Cal é a vosa experiencia neste tema?

Dunha banda, queremos comentarvos que vén de publicarse na prensa unha pequena entrevista á nosa presidenta sobre a xuntanza temática do pasado venres. Podedes lela aquí.
Esta semana a nosa asociación apareceu en varias ocasións en El progreso e mais na edición luguesa de La Voz de Galicia, así que desexamos aproveitar para agradecer aos devanditos xornais que nos axuden a publicitar a nosa actividade e así chegar a un maior número de persoas.

Doutra banda, informámosvos de que xa temos trípticos actualizados.
De facervos falla, achegádevos a unha das nosas xuntanzas e levade os que precisedes...
Podedes informarvos sobre outras formas de colaborar connosco aquí.
Moitas grazas!!

A lactancia materna existe!

2011-03-25T18:06:00.000+01:00

E debería aparecer...

... nas novas e nos documentais sobre animais...

(Si si, isto é o normal, non que o granxeiro dea mamadeiras aos añiños!)

... nos debuxos animados...

(Nesta escea de "Ponyo no acantilado" (Hayao Miyazaki, 2008) a nena ofrece un sándwich ao bebé e a nai explícalle que este se alimenta do seu leite. O amigo da nena mesmo rememora con agarimo cando el era aleitado... En cambio nos Looney tunes até o pitiño ten mamadeira!)

Pensade un intre e dicídenos... Onde máis "non existe" a lactancia materna?

Congresos

2011-03-25T18:00:00.000+01:00

Informámovos que proximamente terán lugar dous importantes congresos sobre o noso tema, a lactación materna:
- Congreso da Ihan (Ávila, 7 a 9 de abril 2011)
Programa
- Congreso de Fedalma (Castelldefells, 1 e 2 de xullo 2011)
Programa

Reunión temática de marzo

2011-03-19T10:02:00.000+01:00

O venres 25 de marzo trataremos tres temas sobre os que seguramente vos xorden dúbidas:

1- Lactancia e fertilidade
O aleitamento materno é un bo anticonceptivo durante os primeiros 6 meses sempre que se cumpran as seguintes condicións:
- ausencia de menstruación
- lactancia materna exclusiva
- lactancia materna frecuente e a demanda

2- Lactancia e embarazo
Pódese continuar aleitando durante a xestación, agás que exista unha amenaza real de parto prematuro.
Porén, cómpre saber que as hormonas diminúen a produción de leite cara ao terceiro mes e cambian o seu sabor contra o quinto mes. Algúns nenos e nenas notan tales cambios e destétanse, outros non.

3- Aleitamento en tándem
Neste punto animámosvos a ler a experiencia dunha das nosas socias;)

Podedes aprender máis sobre estas cuestións aquí e, por suposto, na nosa xuntanza do vindeiro venres - coma sempre, a partires das 17 horas no noso local do Centro Lug II.
Aproveitamos para lembrarvos o relatorio programado para ese mesmo día na Mariña...
En fin, sexa na sé de Lugo ou na de Foz... Agardámosvos!

Obradoiros para nenos e nenas

2011-03-19T10:01:00.001+01:00

Comprácenos anunciarvos que a Tradescola, unha escola de música e baile tradicional xestionada pola Asociación de Gaiteiros Galegos e subvencionada por diversas administracións, impartirá unha actividade para nenos e nenas durante as nosas xuntanzas en horario de tarde (segundo e último venres de cada mes).

Aínda que as reunións teñen lugar de 17 a 19 horas, os obradoiros celebraranse ao comezo da xuntanza e terán unha duración aproximada de media hora.

Esperamos que vos pareza tan boa idea coma a nós;)

Comezamos xa o venres 25 de marzo -ides vir?

Feliz día do pai!

2011-03-19T10:00:00.000+01:00

Hoxe queremos dar as grazas a todos os pais que, co voso amor, apoio e respeto incondicionais, facedes posíbel que as mulleres aleitemos a nosos nenos e nosas nenas.
Que gocedes do voso día!